ఓస్లో: ఉక్రెయిన్(Ukraine) అధ్యక్షుడు వొలోదిమిర్ జెలెన్‌స్కీ(Volodymyr Zelenskyy) ప్రయాణిస్తున్న విమానానికి(Flight) తృటిలో డ్రోన్(Drone) ప్రమాదం తప్పిందని నార్వే ప్రధాని (Norway PM) జోనాస్ గార్ స్టోర్ (Jonas Gahr Støre) వెల్లడించారు. మోల్డోవా నుంచి నార్వే రాజధాని ఓస్లోకు బయలుదేరే సమయంలో ఈ ఘటన చోటుచేసుకున్నట్లు తెలిపారు. మోల్డోవా గగనతలంలో డ్రోన్ ముప్పు గుర్తించడంతో కొంతసేపు విమాన రాకపోకలను నిలిపివేయగా, జెలెన్‌స్కీ విమానంతో పాటు మరికొన్ని విమానాలు ఆలస్యమయ్యాయి. అయితే డ్రోన్ విమానానికి ఎంత సమీపంలోకి వచ్చింది, అది ప్రత్యేకంగా జెలెన్‌స్కీ విమానాన్నే లక్ష్యంగా చేసుకుందా అనే విషయంపై స్పష్టత లేదని అధికారులు తెలిపారు.
మోల్డోవా అధికారులు ఈ డ్రోన్ రష్యాకు (Russia) చెందినదిగా అనుమానిస్తున్నారు. అది ఉక్రెయిన్ వైపు నుంచి మోల్డోవా గగనతలంలోకి ప్రవేశించినట్లు ప్రభుత్వ ప్రతినిధి పేర్కొన్నారు. అనంతరం రిస్కాని (Riscani) జిల్లాలోని ఓ ప్రాంతంలో డ్రోన్ కూలి పేలిపోయింది. ఘటనాస్థలంలో లభించిన శకలాలు, ప్రొపల్షన్ వ్యవస్థ రష్యా-ఉక్రెయిన్ యుద్ధంలో(Russia-Ukraine War) విస్తృతంగా ఉపయోగిస్తున్న Geran-type డ్రోన్లను పోలి ఉన్నట్లు మోల్డోవా అధికారులు తెలిపారు. డ్రోన్ ముందుగా రొమేనియా గగనతలంలోకి కూడా ప్రవేశించినట్లు సమాచారం. NATO సభ్యదేశమైన రొమేనియాలో డ్రోన్ కదలికలను గుర్తించేందుకు స్పానిష్ వైమానిక దళానికి చెందిన రెండు F-18 యుద్ధ విమానాలను రంగంలోకి దించినట్లు అంతర్జాతీయ మీడియా పేర్కొంది.
డ్రోన్ ముప్పు కారణంగా విమాన ప్రయాణంలో ఆలస్యం జరిగినప్పటికీ జెలెన్‌స్కీ సురక్షితంగా ఓస్లో చేరుకున్నారు. ఆయన నార్వేలో రాజు హరాల్డ్ V అంత్యక్రియలకు హాజరై, ప్రధాని జోనాస్ గార్ స్టోర్‌తో పాటు రక్షణ రంగ ప్రతినిధులతో సమావేశమయ్యారు. అయితే జెలెన్‌స్కీ విమానాన్ని డ్రోన్ ఉద్దేశపూర్వకంగా లక్ష్యంగా చేసుకుందా అనే అంశంపై ఇప్పటివరకు ఎలాంటి నిర్ధారణ లేదు. 2022లో రష్యా పూర్తి స్థాయి యుద్ధాన్ని ప్రారంభించిన తర్వాత మోల్డోవా, రొమేనియా గగనతలాల్లో డ్రోన్ ఘటనలు పలు మార్లు చోటుచేసుకున్న నేపథ్యంలో తాజా ఘటనతో ప్రాంతీయ పౌర విమానయాన భద్రతపై మరోసారి ఆందోళనలు వ్యక్తమవుతున్నాయి.
