తిరుమల తిరుపతి దేవస్థానం (టీటీడీ) డిప్యూటీ ఈఓ లోకనాథం ఇంట్లో అవినీతి నిరోధక శాఖ (ఏసీబీ) అధికారులు సోదాలు నిర్వహిస్తున్నారు. ఆదాయానికి మించిన ఆస్తులు కలిగి ఉన్నారన్న ఆరోపణల నేపథ్యంలో ఈ తనిఖీలు చేపట్టినట్లు ఏసీబీ అధికారులు వెల్లడించారు.
తిరుపతిలోని పెద్దకాపు లేఔట్లో ఉన్న లోకనాథం నివాసంలో ఏసీబీ అధికారులు సోదాలు చేపట్టారు. సోదాలు జరుగుతున్న సమయంలో లోకనాథం ఇంట్లోనే ఉన్నట్లు అధికారులు తెలిపారు. ఆయనకు సంబంధించిన ఆస్తులు, ఆర్థిక లావాదేవీలు, కీలకమైన పత్రాలను అధికారులు పరిశీలిస్తున్నట్లు సమాచారం. సోదాల్లో కోట్ల రూపాయల విలువైన ఆస్తులు ఉన్నట్లు గుర్తించినట్లు ఏసీబీ అధికారులు తెలిపారు. అయితే ఆస్తుల విలువ, వాటి వివరాలను దర్యాప్తు పూర్తయిన తర్వాత వెల్లడిస్తామని స్పష్టం చేశారు.
లోకనాథంపై ఆదాయానికి మించిన ఆస్తులు ఉన్నాయన్న ఆరోపణలపై కేసు నమోదు చేసినట్లు ఏసీబీ డీఎస్పీ తెలిపారు. నెల్లూరు ఏసీబీ కోర్టు నుంచి సెర్చ్ వారెంట్ తీసుకున్న అనంతరం సోదాలు చేపట్టినట్లు వెల్లడించారు. తిరుపతి, పరిసర ప్రాంతాల్లోని లోకనాథం బంధువుల ఇళ్లలోనూ ఏసీబీ అధికారులు తనిఖీలు నిర్వహిస్తున్నట్లు తెలిపారు. ఆయనకు సంబంధించిన ఆస్తులు, పత్రాలు, ఇతర వివరాలను అధికారులు సేకరిస్తున్నట్లు చెప్పారు.
లోకనాథం ప్రస్తుతం తిరుమలలో డిప్యూటీ ఈఓగా పనిచేస్తున్నారు. ఆయన తిరుమలలోని కార్యాలయంలోనూ ఏసీబీ అధికారులు సోదాలు నిర్వహించనున్నట్లు డీఎస్పీ తెలిపారు. ఇంటితో పాటు కార్యాలయంలో లభించే పత్రాలు, రికార్డులు, ఇతర ఆధారాలను పరిశీలించనున్నట్లు చెప్పారు.
లోకనాథం తన ఉద్యోగ ప్రస్థానాన్ని జూనియర్ అసిస్టెంట్గా ప్రారంభించి డిప్యూటీ ఈఓ స్థాయికి చేరుకున్నారని ఏసీబీ అధికారులు తెలిపారు. ఆయనకు ఉన్న ఆదాయ వనరులు, ఆస్తులు, ఉద్యోగ కాలంలో సంపాదించిన ఆస్తుల వివరాలను అధికారులు పరిశీలిస్తున్నారు. సోదాలు పూర్తయిన తర్వాత గుర్తించిన ఆస్తులు, వాటి విలువ, ఆదాయానికి మించిన ఆస్తులపై పూర్తి వివరాలను వెల్లడిస్తామని ఏసీబీ డీఎస్పీ తెలిపారు. దర్యాప్తు కొనసాగుతోంది.
