కూటమి పాలనలో రాష్ట్రంలోని దేవాలయాల భద్రతపై (Temple Security) తీవ్ర సందేహాలు వ్యక్తమవుతున్నాయి. డాక్టర్ బి.ఆర్. అంబేద్కర్ కోనసీమ జిల్లాలోని సుప్రసిద్ధ ద్రాక్షారామ శ్రీ భీమేశ్వర స్వామి ఆలయంలో కపాలేశ్వర స్వామి శివలింగం (Kapaleswara Swamy Shiva Lingam) ధ్వంసం అయిన ఘటన రాజకీయంగా, సామాజికంగా పెద్ద చర్చకు దారి తీసింది. ఈ నేపథ్యంలో ధ్వంసమైన ప్రాంతాన్ని వైసీపీ(YSRCP) నేత, మాజీ ఎమ్మెల్యే మల్లాది విష్ణు పరిశీలించి కూటమి ప్రభుత్వంపై తీవ్ర విమర్శలు చేశారు.
ఈ సందర్భంగా మల్లాది విష్ణు (Malladi Vishnu) మాట్లాడుతూ, కూటమి ప్రభుత్వం (Alliance Government) అధికారంలోకి వచ్చిన తర్వాత హిందూ సమాజానికి విఘాతం కలిగే ఘటనలు పెరిగిపోయాయని ఆరోపించారు. ద్రాక్షారామ ఘటన ప్రభుత్వ బాధ్యతారాహిత్యానికి నిదర్శనమని పేర్కొన్నారు. ఘటన జరిగిన వెంటనే ఆగమేఘాలపై సాంప్రదాయం, సంప్రోక్షణ పాటించకుండా, వేద పండితుల సలహాలు తీసుకోకుండా ఎక్కడో తయారు చేసిన శివలింగాన్ని పునఃప్రతిష్ట చేయడం శాస్త్ర విరుద్ధమని ఆయన అభిప్రాయపడ్డారు.
భారతదేశంలో అత్యంత మహిమగల శైవక్షేత్రాల్లో ఒకటైన ద్రాక్షారామ భీమేశ్వర స్వామి ఆలయంలో సీసీ కెమెరాలు లేకపోవడం దారుణమని మల్లాది విష్ణు విమర్శించారు. గత 18 నెలలుగా రాష్ట్రవ్యాప్తంగా ఇలాంటి ఘటనలు కోకొల్లలుగా జరుగుతున్నాయని, ఆలయాల్లో హుండీల నిర్వహణ, గోశాలలు, అన్నదానం, ప్రసాదం వంటి అంశాల్లో కూడా ప్రభుత్వ నిర్లక్ష్యం స్పష్టంగా కనిపిస్తోందని ఆరోపించారు. ఈ ఘటనపై స్వామీజీలు, హిందూ ధార్మిక సంఘాలు స్పందించి ఆలయాల రక్షణ కోసం ముందుకు రావాల్సిన అవసరం ఉందన్నారు.
ద్రాక్షారామ ఘటనపై పూర్తిస్థాయి విచారణ జరపాలని డిమాండ్ చేస్తూ, మాజీ మంత్రి మల్లాది విష్ణు ఎంపీ పిల్లి సుభాష్ చంద్రబోస్, కోఆర్డినేటర్ సూర్యప్రకాష్తో కలిసి రామచంద్రపురం ఆర్డీవోకు వినతి పత్రం అందజేశారు. దేవాలయ వ్యవస్థను కూటమి ప్రభుత్వం నిర్వీర్యం చేస్తోందని విమర్శిస్తూ, ఆలయాల భద్రత, పరిరక్షణపై ప్రభుత్వం వెంటనే చర్యలు తీసుకోవాలని ఆయన కోరారు.
