పశ్చిమ బెంగాల్(West Bengal) రాజకీయాల్లో సంచలన పరిణామాలు చోటుచేసుకున్నాయి. అధికార తృణమూల్ కాంగ్రెస్ (టీఎంసీ) (TMC) పార్టీలో నెలకొన్న అంతర్గత విభేదాలు ఇప్పుడు బహిరంగ తిరుగుబాటుగా మారాయి. పార్టీ అధినేత్రి మమతా బెనర్జీ (Mamata Banerjee) నాయకత్వానికి సవాల్ విసురుతూ రితాబ్రతా బెనర్జీ (Ritabrata Banerjee) నేతృత్వంలోని రెబెల్ వర్గం సమాంతర జాతీయ కమిటీని ప్రకటించింది. ఈ సమావేశంలో మమతా బెనర్జీని పార్టీ అధ్యక్ష పదవి నుంచి తొలగించినట్లు ప్రకటించడంతో పాటు, సీనియర్ ఎమ్మెల్యే అరూప్ రాయ్‌ను (Arup Roy) టీఎంసీ కొత్త ఛైర్‌పర్సన్‌గా ఎన్నుకున్నట్లు వెల్లడించింది. అంతేకాకుండా, పార్టీ జాతీయ ప్రధాన కార్యదర్శి అభిషేక్ బెనర్జీని (Abhishek Banerjee) సస్పెండ్ చేస్తున్నట్లు ప్రకటించడం రాజకీయ వర్గాల్లో తీవ్ర చర్చకు దారితీసింది.
కోల్‌కతా న్యూటౌన్‌లోని ఓ ఫైవ్ స్టార్ హోటల్‌లో నిర్వహించిన సమావేశానికి పలువురు ఎమ్మెల్యేలు, కౌన్సిలర్లు, మాజీ ప్రజాప్రతినిధులు హాజరయ్యారు. పార్టీ రాజ్యాంగం ప్రకారం ప్రతి మూడు సంవత్సరాలకు జాతీయ కార్యవర్గాన్ని పునర్వ్యవస్థీకరించాల్సి ఉన్నప్పటికీ, ప్రస్తుత నాయకత్వం ఆ ప్రక్రియను విస్మరించిందని రెబెల్ నేతలు ఆరోపించారు. ఈ నేపథ్యంలో కొత్త జాతీయ కమిటీని ఏర్పాటు చేసినట్లు ప్రకటించిన వారు, పార్టీ ఆర్థిక వ్యవహారాలపై స్వతంత్ర ఆడిట్ నిర్వహించాలని కూడా నిర్ణయించారు. తమ కమిటీయే తృణమూల్ కాంగ్రెస్‌కు(TMC) చట్టబద్ధమైన వారసత్వమని వారు వాదిస్తున్నారు.
అయితే ఈ పరిణామాలను మమతా బెనర్జీకి విధేయులైన అధికారిక టీఎంసీ వర్గం తీవ్రంగా ఖండించింది. టీఎంసీ(TMC) అంటేనే మమతా బెనర్జీ అని పేర్కొంటూ, రెబెల్ వర్గం చర్యలను రాజకీయ ప్రహసనంగా అభివర్ణించింది. పార్టీ సీనియర్ నేత కునాల్ ఘోష్ స్పందిస్తూ, ఈ వ్యవహారం ఇప్పటికే న్యాయస్థాన పరిధిలో ఉందని, చట్టపరమైన ప్రక్రియ పూర్తయ్యే వరకు ఇటువంటి ప్రకటనలకు ఎలాంటి ప్రాధాన్యత లేదని వ్యాఖ్యానించారు. దీంతో టీఎంసీలోని అంతర్గత పోరు మరింత ముదిరి, పశ్చిమ బెంగాల్ రాజకీయాల్లో ఉత్కంఠను పెంచుతోంది.
