బ్రిక్స్ శిఖరాగ్ర సదస్సు(BRICS Summit) తొలి రోజు సమావేశాలు ముగిశాయి. ఈ సందర్భంగా బ్రిక్స్ (BRICS) దేశాలు ‘న్యూ ఢిల్లీ డిక్లరేషన్’ను (New Delhi Declaration) ఆమోదించాయి. అంతర్జాతీయంగా నెలకొన్న యుద్ధాలు(Wars), ఘర్షణలు(Conflicts), వివాదాలకు (Disputes) శాంతియుత పరిష్కారాలు కనుగొనాల్సిన అవసరాన్ని బ్రిక్స్ దేశాలు నొక్కిచెప్పాయి. చర్చలు, దౌత్య మార్గాల ద్వారానే సమస్యలను పరిష్కరించేందుకు కట్టుబడి ఉన్నట్లు సంయుక్త ప్రకటనలో స్పష్టం చేశాయి. 18వ బ్రిక్స్ శిఖరాగ్ర సదస్సుకు ప్రపంచవ్యాప్తంగా పలువురు అగ్రనేతలు మరియు ప్రముఖులు హాజరయ్యారు.
అంతర్జాతీయ చట్టాలను (International Laws) అన్ని దేశాలు గౌరవించాలని బ్రిక్స్ కూటమి సూచించింది. ఏకపక్షంగా సుంకాలు విధించడం వంటి చర్యలపై కూడా తీవ్ర అభ్యంతరం వ్యక్తం చేసింది. అంతర్జాతీయ వాణిజ్య వ్యవస్థలో(International Trading System) పరస్పర సహకారం, న్యాయబద్ధమైన విధానాలు అవసరమని పేర్కొంది.
ప్రపంచవ్యాప్తంగా కొనసాగుతున్న యుద్ధాలు, ఘర్షణల విషయంలో బ్రిక్స్ దేశాలు ఆందోళన వ్యక్తం చేశాయి. ఆయా సమస్యల మూల కారణాలను గుర్తించి పరిష్కరించేందుకు అంతర్జాతీయ సమాజం ప్రయత్నాలు చేయాలని పిలుపునిచ్చాయి. ప్రపంచంలో అణు యుద్ధం (Nuclear War) జరిగే ప్రమాదంపై కూడా బ్రిక్స్ దేశాలు ఆందోళన వ్యక్తం చేశాయి. అణ్వాయుధాల వినియోగం వల్ల కలిగే విపత్కర పరిణామాలను దృష్టిలో ఉంచుకుని శాంతి(Peace), స్థిరత్వాన్ని(Stability) కాపాడేందుకు అన్ని దేశాలు బాధ్యతాయుతంగా వ్యవహరించాలని పిలుపునిచ్చాయి.
2025 ఏప్రిల్ 22న జమ్మూ కాశ్మీర్లోని (Jammu and Kashmir) పహల్గాంలో(Pahalgam) జరిగిన ఉగ్రదాడిని (Terrorist Attack) బ్రిక్స్ దేశాలు తీవ్రంగా ఖండించాయి. ఈ దాడిలో 26 మంది ప్రాణాలు కోల్పోగా, పలువురు గాయపడ్డారు. మృతులకు బ్రిక్స్ దేశాలు నివాళులర్పించాయి. ఉగ్రవాదం ఏ రూపంలో ఉన్నా, ఎక్కడ జరిగినా, ఎలాంటి కారణాలు చూపించినా దాన్ని తీవ్రంగా ఖండిస్తున్నట్లు బ్రిక్స్ దేశాలు స్పష్టం చేశాయి. సరిహద్దు దాటి జరిగే ఉగ్రవాదం, ఉగ్రవాద సంస్థలకు ఆర్థిక సహాయం, ఉగ్రవాదులకు ఆశ్రయం కల్పించే స్థావరాల నిర్మూలనకు కట్టుబడి ఉన్నట్లు బ్రిక్స్ దేశాలు పేర్కొన్నాయి.
ఉగ్రవాదాన్ని ఏ మతం, జాతీయత, నాగరికత లేదా జాత్యహంకార సమూహంతోనూ ముడిపెట్టకూడదని స్పష్టం చేశాయి. ఉగ్రవాదంపై ఎలాంటి సహనం ఉండకూడదని, ఉగ్రదాడులకు పాల్పడిన బాధ్యులపై కఠిన చర్యలు తీసుకోవాలని పిలుపునిచ్చాయి. ఐక్యరాజ్యసమితి గుర్తించిన ఉగ్రవాదులు, ఉగ్రవాద సంస్థలపై అంతర్జాతీయ సమాజం సమన్వయంతో చర్యలు తీసుకోవాలని బ్రిక్స్ దేశాలు కోరాయి. అదేవిధంగా ఐక్యరాజ్యసమితి పరిధిలో ప్రతిపాదిత ‘కాంప్రహెన్సివ్ కన్వెన్షన్ ఆన్ ఇంటర్నేషనల్ టెర్రరిజం’ (CCIT)ను త్వరగా ఖరారు చేసి, ఆమోదించాలని పిలుపునిచ్చాయి.
మొత్తంగా బ్రిక్స్ శిఖరాగ్ర సదస్సు తొలి రోజు సమావేశాల్లో అంతర్జాతీయ శాంతి, భద్రత, ఉగ్రవాద నిరోధం, అంతర్జాతీయ చట్టాల గౌరవం, వాణిజ్య సహకారం వంటి అంశాలపై ప్రధానంగా చర్చ జరిగింది. న్యూ ఢిల్లీ డిక్లరేషన్ ద్వారా ప్రపంచ సమస్యలకు చర్చలు, దౌత్య మార్గాల ద్వారా పరిష్కారాలు కనుగొనేందుకు తమ నిబద్ధతను బ్రిక్స్ దేశాలు మరోసారి స్పష్టం చేశాయి.
