స్థానిక పోరుకు సిద్ధం కండి.. క్యాడ‌ర్‌తో జగన్ కీలక వ్యాఖ్యలు

రాజమండ్రి రూరల్ (Rajahmundry Rural) క్యాడర్ సమావేశంలో వైసీపీ(YSRCP) అధినేత, మాజీ ముఖ్యమంత్రి వైఎస్ జగన్(YS Jagan) కీలక వ్యాఖ్యలు చేశారు. రాబోయే స్థానిక సంస్థల ఎన్నికలకు (Local Body Elections) పార్టీ శ్రేణులు ఇప్పటి నుంచే సిద్ధం కావాలని పిలుపునిచ్చారు. గెలుపే లక్ష్యంగా ప్రతి కార్యకర్త ప్రజల్లో నిరంతరం ఉండాలని సూచించారు.

ఎన్నికలు ఎప్పుడు జరిగినా వైసీపీ గెలుపే (YSRCP Victory) లక్ష్యంగా పనిచేయాలని సూచించారు. ప్రజల్లో పార్టీకి ఆదరణ పెరుగుతోందని, అదే పార్టీ విజయానికి బలమని పేర్కొన్నారు. కూటమి ప్రభుత్వంపై (Coalition Government) ప్రజల్లో తీవ్ర వ్యతిరేకత ఉందని జగన్ వ్యాఖ్యానించారు. విద్యార్థులు, రైతులు, మహిళలు, వృద్ధులు, ఉద్యోగులు, వ్యాపారులు.. ఇలా ఏ ఒక్క వర్గం కూడా ప్రభుత్వ పాలనతో సంతృప్తిగా లేదని అన్నారు. ఎన్నికల ముందు ఇచ్చిన హామీల్లో(Election Promises) ఏ ఒక్కటీ పూర్తిగా అమలు చేయలేదని ఆరోపించారు.

స్థానిక ఎన్నికల్లో కూటమి ప్రభుత్వంపై ప్రజల్లో ఉన్న వ్యతిరేకత బయటపడకుండా పోలీసు వ్యవస్థను (Police System) ఉపయోగించే అవకాశం ఉందని జగన్ ఆరోపించారు. ఎలాంటి ఒత్తిళ్లు, ఇబ్బందులు ఎదురైనా వాటిని ధైర్యంగా ఎదుర్కొని ఎన్నికల పోరులో ముందుకు సాగాలని పార్టీ శ్రేణులకు సూచించారు. ‘‘మనకు అత్యంత ప్రజాదరణ (Popularity) ఉంది. అందుకే తప్పకుండా గెలుస్తాం’’ అని జగన్ ధీమా వ్యక్తం చేశారు.

రాష్ట్రంలో శాంతిభద్రతలు (Law and Order) దారుణంగా దిగజారాయని జగన్ విమర్శించారు. ఇసుక, మట్టి, మద్యం మాఫియాలతో పాటు గంజాయి రవాణా (Ganja Transportation) వ్యవహారాలు కూడా వెలుగులోకి వస్తున్నాయని అన్నారు. పోలీసుల వాహనంలో గంజాయి లభించిన ఘటనను ప్రస్తావిస్తూ.. వ్యవస్థలు ఏ స్థాయికి దిగజారిపోయాయో ఈ ఘటన నిదర్శనమని వ్యాఖ్యానించారు. ఈ ఘటన నుంచి ప్రజల దృష్టిని మళ్లించేందుకు ఇతర అంశాలను తెరపైకి తీసుకొస్తున్నారని జగన్ ఆరోపించారు.

రాజమండ్రిలో డాక్టర్ ప్రియాంక(Dr. Priyanka) హత్య ఘటనను కూడా జగన్ ప్రస్తావించారు. ఆమెను కారుతో పలుమార్లు ఢీకొట్టి హత్య చేశారని, అయినప్పటికీ ఈ ఘటన బయటకు రాకుండా తొక్కిపెట్టే ప్రయత్నం జరిగిందని ఆరోపించారు. పోలీసులు(Police), అధికార పార్టీకి చెందిన కొందరు వ్యక్తులు కుమ్మక్కై వ్యవహరిస్తున్నారని జగన్ విమర్శించారు. రాష్ట్రంలో శాంతిభద్రతల పరిస్థితిపై ప్రభుత్వం సమాధానం చెప్పాలని డిమాండ్ చేశారు.

వైసీపీ ప్రభుత్వ (YSRCP Government) హయాంలో జరిగిన అభివృద్ధి(Development), సంక్షేమ కార్యక్రమాలను (Welfare Schemes) ప్రస్తుత కూటమి ప్రభుత్వ పాలనతో ప్రజలు పోల్చి చూస్తున్నారని జగన్ అన్నారు. గత ఐదేళ్ల పాలన, ప్రస్తుత ప్రభుత్వ పాలనపై ప్రతి ఇంట్లో చర్చ జరుగుతోందని పేర్కొన్నారు.

వైసీపీకి ప్రజాదరణ రోజురోజుకూ పెరుగుతోందని, అదే సమయంలో కూటమి ప్రభుత్వంపై వ్యతిరేకత పెరుగుతోందని జగన్ వ్యాఖ్యానించారు. ‘‘మరో ఏడాదిలో నా పాదయాత్ర మొదలవుతుంది. ఆ తర్వాత ఏడాది ఎన్నికలు జరుగుతాయి. ఎన్నికలు ఎప్పుడు జరిగినా మనదే విజయం’’ అని జగన్ ధీమా వ్యక్తం చేశారు.

ప్రతి కార్యకర్త నిత్యం ప్రజలతో మమేకమై వారి సమస్యలను తెలుసుకోవాలని, పార్టీ బలోపేతానికి క్షేత్రస్థాయిలో పనిచేయాలని సూచించారు. స్థానిక సంస్థల ఎన్నికలను పార్టీకి కీలకమైన పోరుగా భావించి ఇప్పటి నుంచే కేడర్‌ను సమాయత్తం చేయాలని జగన్ పిలుపునిచ్చారు.