సినిమాల్లో నోట్ల వర్షం కురవడం చూసుంటారు.. లేదా ఎవరైనా ధనవంతులు సరదాగా నోట్లు గాల్లోకి విసరడం చూసుంటారు. కానీ, ఉత్తరప్రదేశ్లో (Uttar Pradesh) ఏకంగా ఒక కోతి (Monkey) నోట్ల వర్షం (Money Shower) కురిపించింది. చెట్టుపై (Tree) కూర్చుని ఏకంగా రెండు లక్షల రూపాయల కరెన్సీ నోట్లను (Currency Notes) గాల్లోకి విసిరేస్తూ అందరినీ షాక్కు గురిచేసింది. గాల్లోంచి నోట్ల కట్టలు కింద పడుతుండటంతో.. రోడ్డుపై వెళ్లే జనం, స్థానికులు వాటిని ఏరుకునేందుకు పోటీ పడ్డారు. ప్రస్తుతం దీనికి సంబంధించిన వీడియో సోషల్ మీడియాలో విపరీతంగా వైరల్ అవుతోంది.
అసలేం జరిగింది?
ఉత్తరప్రదేశ్లోని ఒక రిజిస్ట్రేషన్ కార్యాలయం (Registration Office) పరిసరాల్లో ఈ విచిత్ర ఘటన చోటుచేసుకుంది. ఒక వ్యక్తి తన ఆస్తి రిజిస్ట్రేషన్ పనుల నిమిత్తం సుమారు రూ.2 లక్షల నగదును ఒక బ్యాగులో పెట్టుకుని తన న్యాయవాదితో (Lawyer) కలిసి అక్కడికి వచ్చాడు. వారు రిజిస్ట్రార్ ఆఫీస్ వెలుపల మాట్లాడుకుంటున్న సమయంలో.. ఎక్కడి నుంచి వచ్చిందో కానీ ఒక కోతి హఠాత్తుగా వారిపైకి దూకింది.
క్షణాల వ్యవధిలో సదరు న్యాయవాది చేతిలో ఉన్న డబ్బుల బ్యాగ్ను లాక్కుని ఠక్కున పక్కనే ఉన్న ఒక పెద్ద చెట్టు పైకి ఎక్కేసింది. బాధితులు కింద నుంచి కేకలు వేస్తూ, కోతికి అరటిపండ్లు, ఇతర తినుబండారాలు చూపిస్తూ బ్యాగును కిందకు పడేయాలని బ్రతిమిలాడటం ప్రారంభించారు. తినుబండారాల కోసం చూసిన కోతికి బ్యాగులో కేవలం కాగితాల కట్టలు మాత్రమే కనిపించాయి. దీంతో తీవ్ర అసహనానికి గురైన ఆ కోతి.. బ్యాగు జిప్ తీసి అందులోని 500, 100 రూపాయల నోట్ల కట్టలను ఒక్కొక్కటిగా బయటకు తీసి గాల్లోకి విసరడం మొదలుపెట్టింది.
ఆకాశం నుంచి 500 నోట్లు రాలిపడుతుండటాన్ని గమనించిన స్థానికులు, వాహనదారులు తమ వాహనాలను రోడ్డుపైనే నిలిపివేసి నోట్లను ఏరుకోవడానికి పరుగులు తీశారు. దీంతో కాసేపు అక్కడ తీవ్రమైన తొక్కిసలాట లాంటి పరిస్థితి నెలకొంది. రోడ్డుపై ట్రాఫిక్ పూర్తిగా స్తంభించిపోయింది.
