తిరుమల శ్రీవారి దర్శనం (Tirumala Srivari Darshan) కోసం విదేశాల (Foreign) నుంచి వచ్చే భక్తులకు (Devotees) కేంద్ర ప్రభుత్వం (Central Government) కీలక సౌకర్యం కల్పించనుంది. తిరుపతి విమానాశ్రయంలోనే(Tirupati Airport) ఈ-వీసా సేవలను (e-Visa Services) అందుబాటులోకి తీసుకురావాలని కేంద్రం నిర్ణయించింది. దీంతో విదేశీ ప్రయాణికులకు తిరుపతి చేరుకునే ప్రక్రియ మరింత సులభతరం కానుంది.
ఇప్పటివరకు విదేశీ భక్తులు తిరుపతి రావాలంటే ముందుగా చెన్నై, బెంగళూరు లేదా హైదరాబాద్ విమానాశ్రయాలకు చేరుకోవాల్సి వచ్చేది. అక్కడ ఈ-వీసా ప్రక్రియ పూర్తి చేసుకున్న అనంతరం రోడ్డు, ఇతర మార్గాల్లో తిరుపతికి చేరుకునేవారు.
తాజా నిర్ణయంతో ఇకపై తిరుపతి విమానాశ్రయంలోనే ఈ-వీసా సేవలు అందుబాటులోకి రానున్నాయి. దీంతో విదేశాల నుంచి వచ్చే ప్రయాణికులు నేరుగా తిరుపతి విమానాశ్రయానికి చేరుకుని ఈ-వీసా ప్రక్రియను పూర్తి చేసుకునే అవకాశం కలగనుంది.
అయితే విదేశీ ప్రయాణికులు తమ ప్రయాణానికి కనీసం 10 రోజుల ముందుగానే ఆన్లైన్లో ఈ-వీసా పొందాల్సి ఉంటుంది. తిరుపతి విమానాశ్రయంలో ఈ-వీసా కౌంటర్ను (e-Visa Counter) ఏర్పాటు చేసేందుకు కేంద్ర పౌర విమానయాన శాఖ ఇప్పటికే అనుమతి ఇచ్చింది.
ప్రస్తుతం తిరుపతి విమానాశ్రయం నుంచి అంతర్జాతీయ విమాన సర్వీసులు అందుబాటులో లేనప్పటికీ, ముందుగానే ఈ-వీసా కౌంటర్కు అనుమతి ఇవ్వడం ప్రాధాన్యత సంతరించుకుంది. త్వరలో తిరుపతి నుంచి అంతర్జాతీయ విమాన సర్వీసులు ప్రారంభమయ్యే అవకాశం ఉందనే చర్చకు ఇది మరింత బలం చేకూరుస్తోంది.
తిరుపతి విమానాశ్రయానికి అంతర్జాతీయ హోదా కల్పించే నిర్ణయాన్ని కేంద్ర కేబినెట్ 2007లోనే తీసుకుంది. అనంతరం 2017లో అధికారిక నోటిఫికేషన్ కూడా విడుదలైంది. అయితే అంతర్జాతీయ హోదా వచ్చినప్పటికీ ఇప్పటివరకు తిరుపతి విమానాశ్రయం నుంచి అంతర్జాతీయ విమాన సర్వీసులు ప్రారంభం కాలేదు.
తాజా ఈ-వీసా సౌకర్యంతో విదేశీ భక్తులకు (Foreign Devotees) తిరుపతి ప్రయాణం మరింత సులభతరం కానుంది. అంతర్జాతీయ విమాన సర్వీసులు కూడా ప్రారంభమైతే శ్రీవారి దర్శనం కోసం విదేశాల నుంచి వచ్చే భక్తులకు మరింత ప్రయోజనం కలగనుంది.
