బంగ్లాదేశ్ మాజీ ప్రధాని షేక్ హసీనా(Sheikh Hasina) 2024 ఆగస్టులో దేశాన్ని విడిచిపెట్టే సమయంలో వైరల్‌గా మారిన వీడియో మరోసారి చర్చనీయాంశంగా మారింది. ఆ వీడియోతో సంబంధం ఉన్నట్లు భావిస్తున్న బంగ్లాదేశ్ మాజీ వైమానిక దళ అధికారి (Former Bangladesh Air Force Officer) కేఎం తహ్సీఫ్ సౌరీ (KM Tahsif Sauri) అనుమానాస్పద స్థితిలో మృతిచెందారు.
ఢాకాలోని(Dhaka) తురాగ్ నదిలో(Turag River) ఆయన మృతదేహాన్ని పోలీసులు గుర్తించారు. 28 ఏళ్ల సౌరీ అక్టోబర్ 27 నుంచి కనిపించకుండా పోగా, మరుసటి రోజు ఆయన మృతదేహం లభ్యమైంది. తొలుత గుర్తుతెలియని మృతదేహంగా భావించిన పోలీసులు, ఆయన వద్ద లభించిన ఐఫోన్, చేతి గడియారం ఆధారంగా గుర్తించినట్లు సమాచారం. ఆయన మరణానికి గల కారణాలు ఇంకా తెలియరాలేదు. పోస్టుమార్టం నివేదిక అనంతరం మరణానికి సంబంధించిన వివరాలు వెల్లడయ్యే అవకాశం ఉంది.
సౌరీ మరణంపై ఆయన కుటుంబ సభ్యులు అనుమానాలు వ్యక్తం చేస్తున్నారు. షేక్ హసీనా దేశం విడిచివెళ్తున్న సమయంలో వైరల్ అయిన వీడియోను షేర్ చేసిన కారణంగా ఆయన వేధింపులకు గురయ్యారని, చివరకు హత్యకు గురయ్యారని ఆయన బంధువు మోష్ఫేకా జహాన్(Moshfeka Jahan) ఆరోపించారు. అయితే, ఆ వీడియోను సౌరీ స్వయంగా చిత్రీకరించలేదని, మరో సహోద్యోగి రికార్డ్ చేసిన దృశ్యాలను మాత్రమే ఆయన షేర్ చేశారని ఆమె పేర్కొన్నారు.
వీడియో ప్రచారంలోకి వచ్చిన తర్వాత ఆయన తీవ్ర మానసిక వేధింపులు (Mental Harassment) ఎదుర్కొన్నారని, వైమానిక దళం (Air Force) నుంచి వైదొలిగిన తర్వాత కూడా డిటెక్టివ్‌లు (Detectives) ఆయనను అనుసరించేవారని ఆరోపించారు. మరణానికి ముందు కొందరు ఆయనను ఇంటి నుంచి బయటకు పిలిచారని కూడా కుటుంబ సభ్యులు పేర్కొన్నట్లు సమాచారం. అయితే, ఈ ఆరోపణలు ఇంకా అధికారికంగా నిర్ధారణ కాలేదు. సౌరీ మరణానికి, వైరల్ వీడియోకు మధ్య సంబంధం ఉందా అనే విషయంపై స్పష్టత రావాల్సి ఉంది.
2024 ఆగస్టు 5న బంగ్లాదేశ్‌లో(Bangladesh) తీవ్రరూపం దాల్చిన విద్యార్థి ఆందోళనల నేపథ్యంలో షేక్ హసీనా ప్రధాని పదవికి(Prime Minister Post) రాజీనామా చేసి దేశాన్ని విడిచిపెట్టారు. సుమారు 15 ఏళ్ల ఆమె పాలనకు ఆ ఘటనతో ముగింపు పలికింది. ఆమె బంగ్లాదేశ్ వైమానిక దళానికి చెందిన C-130J హెర్క్యులెస్ విమానంలో(C-130J Hercules Aircraft) ప్రయాణించి, భారతదేశంలోని (India)ఘజియాబాద్ సమీపాన ఉన్న హిండన్ వైమానిక స్థావరానికి చేరుకున్నట్లు అప్పట్లో వార్తలు వెలువడ్డాయి. ఆమె దేశం విడిచివెళ్తున్న దృశ్యాలు సోషల్ మీడియాలో విస్తృతంగా ప్రచారమయ్యాయి. ఈ ఘటన జరిగిన తర్వాత, 2025 ఆగస్టు 4న సౌరీని వైమానిక దళం బలవంతంగా రాజీనామా చేయించిందనే ఆరోపణలు కూడా ఉన్నాయి. వైరల్ వీడియో కారణంగానే ఆయనపై చర్యలు తీసుకున్నారనే ఊహాగానాలు వ్యక్తమయ్యాయి. అయితే, ఈ పరిణామాలన్నింటికీ ఆయన మరణానికి మధ్య సంబంధం ఉందా అన్నది దర్యాప్తు, అధికారిక నివేదికల ద్వారా తేలాల్సి ఉంది.
