ప్రముఖ పారిశ్రామికవేత్త గౌతమ్ అదానీ తన కుటుంబ సభ్యులతో కలిసి ఒడిశాలోని పూరీలో జరుగుతున్న శ్రీ జగన్నాథ రథయాత్ర ఉత్సవాల్లో శనివారం పాల్గొన్నారు. ఆయనతో పాటు భార్య ప్రీతి అదానీ, కుమారుడు కరణ్ అదానీ కూడా ఈ భక్తి పూరిత ఉత్సవంలో పాల్గొని స్వామివారి దర్శన భాగ్యం పొందారు. ఈ సందర్భంగా కుటుంబ సభ్యులు శ్రద్ధతో పూజలు చేయడం, రథయాత్రను దర్శించుకోవడం జరగగా, ఇందుకు సంబంధించిన వీడియోలు ప్రస్తుతం సోషల్ మీడియాలో వైరల్ అవుతున్నాయి.
జగన్నాథ రథయాత్రలో భక్తుల సందడి
పూరీలో రథయాత్ర ఉత్సవం రెండో రోజు అత్యంత వైభవంగా కొనసాగుతోంది. జగన్నాథుడు, బలభద్రుడు, సుభద్రమ్మవారు రథాలపై ఊరేగిపోతుండగా, లక్షలాదిమంది భక్తులు వీక్షించేందుకు తరలివస్తున్నారు. “హరే కృష్ణ”, “జై జగన్నాథ” నినాదాలతో పూరీ వీధులు మార్మోగుతున్నాయి. స్వామివారి రథాన్ని లాగేందుకు భక్తులు పోటీపడుతున్నారు. గుండిచా ఆలయం దాకా ఈ ఉత్సవం కొనసాగుతుంది.
భద్రతా ఏర్పాట్లు & టెక్నాలజీ వినియోగం
ఈ ఏడాది రథయాత్రకు భక్తుల రద్దీ ఎక్కువగా ఉండే అవకాశం ఉన్న నేపథ్యంలో, 12 లక్షల మందికి పైగా హాజరవుతారని అధికారులు అంచనా వేస్తున్నారు. అందుకే ప్రభుత్వం విస్తృత భద్రతా ఏర్పాట్లు చేపట్టింది. తొలిసారిగా 275 AI కెమెరాలు, డ్రోన్ల ద్వారా రద్దీ నియంత్రణ, భద్రతా పర్యవేక్షణ చేపట్టారు. పోలీస్ శాఖ భారీ స్థాయిలో మానవ వనరులతో కూడిన బందోబస్తును ఏర్పాటు చేసింది.
