కేంద్ర ఆర్థిక మంత్రి నిర్మలా సీతారామన్ తాజా ప్రకటనతో పన్ను చెల్లింపుదారులలో ఆసక్తి రేకెత్తింది. వస్తు సేవల పన్ను (GST) రేట్లు త్వరలో తగ్గనున్నాయని ఆమె స్పష్టం చేశారు. ది ఎకనామిక్ టైమ్స్ అవార్డ్స్ కార్యక్రమంలో ఈ విషయాన్ని వెల్లడించిన ఆమె, జీఎస్టీ శ్లాబులను సరళీకృతం చేయడంపై ప్రభుత్వం తుది దశలో ఉన్నట్టు తెలిపారు.
2017లో జీఎస్టీ ప్రారంభ సమయంలో రెవెన్యూ న్యూట్రల్ రేటు (RNR) 15.8 శాతంగా ఉండగా, 2023 నాటికి అది 11.4 శాతానికి తగ్గిందని ఆమె పేర్కొన్నారు. రాబోయే రోజుల్లో ఇది ఇంకా తగ్గే అవకాశం ఉందని ఆమె నొక్కి చెప్పారు. పన్ను చెల్లింపుదారులకు మరింత సౌకర్యంగా, సరళంగా జీఎస్టీ విధానాన్ని మార్చేందుకు ప్రభుత్వం నిరంతర కృషి చేస్తోందన్నారు.
2021లో ఏర్పాటైన మంత్రుల బృందం (GoM) జీఎస్టీ శ్లాబ్ సంస్కరణపై రూపొందించిన నివేదిక త్వరలో జీఎస్టీ కౌన్సిల్ సమావేశంలో చర్చకు రానుంది. ఈ సమావేశంలో కీలక నిర్ణయాలు తీసుకునే అవకాశం ఉందని సీతారామన్ వెల్లడించారు. ప్రపంచ ఆర్థిక అనిశ్చితుల కారణంగా స్టాక్ మార్కెట్లలో హెచ్చుతగ్గులు సాధారణమేనని ఆమె అభిప్రాయపడ్డారు. ప్రభుత్వ రంగ బ్యాంకుల్లో రిటైల్ పెట్టుబడులను పెంచడానికి ప్రభుత్వం కృషి చేస్తోందని, ఆర్థిక స్థిరత్వాన్ని కాపాడేందుకు అవసరమైన చర్యలు తీసుకుంటామని హామీ ఇచ్చారు.
