ఆంధ్రప్రదేశ్‌లో నేటి నుంచి రెండు రోజుల పాటు రాష్ట్రపతి ద్రౌపది ముర్ము పర్యటించనున్నారు. ఇందులో భాగంగా బుధవారం సాయంత్రం విజయవాడలోని ఇంద్రకీలాద్రిపై కొలువైన శ్రీ కనకదుర్గమ్మను రాష్ట్రపతి దర్శించుకోనున్నారు. రాష్ట్రపతి రాక నేపథ్యంలో ఆలయ పరిసరాల్లో భద్రతను కట్టుదిట్టం చేయడంతో పాటు దర్శన వేళల్లో కీలక మార్పులు చేశారు.
నిర్ణీత షెడ్యూల్ ప్రకారం రాష్ట్రపతి ద్రౌపది ముర్ము బుధవారం సాయంత్రం 7:10 గంటలకు దుర్గగుడికి చేరుకోనున్నారు. సాయంత్రం 7:20 నుంచి 7:40 గంటల వరకు అమ్మవారిని దర్శించుకుని, ప్రత్యేక పూజా కార్యక్రమాల్లో పాల్గొంటారు. అనంతరం ఆశీర్వచనం తీసుకోనున్నారు.
రాష్ట్రపతి ఇంద్రకీలాద్రికి రానున్న నేపథ్యంలో భద్రతా కారణాల దృష్ట్యా ఆలయ దర్శనాల నిర్వహణలో మార్పులు చేశారు. బుధవారం ఉదయం 6 గంటల నుంచి 9 గంటల వరకు మాత్రమే ప్రోటోకాల్ దర్శనాలకు అనుమతి ఉంటుంది.
మధ్యాహ్నం 1 గంట నుంచి కొండపైకి వాహనాల రాకపోకలను పూర్తిగా నిలిపివేయనున్నారు. మధ్యాహ్నం నుంచి ప్రోటోకాల్ దర్శనాలను కూడా నిలిపివేయనున్నారు. అదేవిధంగా రాత్రి 7:45 గంటలకు ఉండే ప్రోటోకాల్ దర్శన స్లాట్‌ను రద్దు చేశారు.
రాష్ట్రపతి పర్యటన సందర్భంగా భద్రతా ఏర్పాట్లకు సహకరించాలని ఆలయ అధికారులు సూచిస్తున్నారు. దర్శనానికి వచ్చే భక్తులు మారిన వేళలను దృష్టిలో ఉంచుకుని తమ ప్రయాణాన్ని ప్లాన్ చేసుకోవాలి. కొండపైకి వాహనాల రాకపోకల నిలిపివేత నేపథ్యంలో అవసరమైన ప్రత్యామ్నాయ ఏర్పాట్లపై ఆలయ అధికారుల సూచనలు పాటించాలి.
