భారతీయ చలనచిత్ర రంగంలో ఒక అధ్యాయం ముగిసింది. దశాబ్దాల పాటు తన అసాధారణమైన ప్రతిభతో వెండితెరపై సరికొత్త ట్రెండ్ను సృష్టించిన దిగ్గజ దర్శకుడు, ‘దర్శక ఇమయం’ (Director Imayam) భారతీరాజా (Bharathiraja) (84) బుధవారం కన్నుమూశారు. గత కొంతకాలంగా అనారోగ్యంతో బాధపడుతున్న ఆయన చెన్నైలోని (Chennai) తన నివాసంలోనే శ్వాస విడిచారు. ఆయన మృతి పట్ల సినీ, రాజకీయ ప్రముఖులు తీవ్ర దిగ్భ్రాంతిని వ్యక్తం చేస్తున్నారు.
1941 జూలై 17న తమిళనాడులోని (Tamil Nadu) తేని జిల్లా అల్లినగరంలో (Allinagaram) జన్మించిన భారతీరాజా.. అప్పటివరకు స్టూడియోలకే పరిమితమైన సినిమాలను నిజమైన పల్లెటూరి వాతావరణంలోకి, అవుట్డోర్ లోకేషన్స్లోకి తీసుకువెళ్లిన విప్లవాత్మక దర్శకుడు. 1977లో కమల్ హాసన్, శ్రీదేవి, రజనీకాంత్ కాంబినేషన్లో వచ్చిన “16 వయతినిలే”(16 Vayathinile) (తెలుగులో ‘పదహారేళ్ల వయసు’) చిత్రంతో దర్శకుడిగా అరంగేట్రం చేసి, తొలి చిత్రంతోనే సంచలనం సృష్టించారు.
తమిళ సినిమాల్లో గ్రామీణ జీవన విధానాన్ని, అక్కడి సంస్కృతిని ఎంతో సహజత్వంతో చూపించి ప్రత్యేక గుర్తింపు పొందారు. అందుకే అభిమానులు, పరిశ్రమ వర్గాలు ఆయన్ను ఎంతో గౌరవంగా “దర్శక ఇమయం” (దర్శకత్వ శిఖరం) అని పిలుచుకుంటారు.
తెలుగు సినిమాతో విడదీయరాని బంధం
భారతీరాజా కేవలం తమిళ చిత్రాలకే పరిమితం కాలేదు. తెలుగులో ఆయన దర్శకత్వం వహించిన క్లాసిక్ లవ్ స్టోరీ ‘సీతాకోకచిలుక’(Seethakoka Chiluka) చిత్రం తెలుగు సినిమా చరిత్రలోనే ఒక మైలురాయిగా నిలిచింది. ఈ చిత్రానికి గాను ఆయన ఉత్తమ ప్రాంతీయ చిత్రంగా ‘భారత జాతీయ చలనచిత్ర పురస్కారం’ (National Award) అందుకోవడంతో పాటు ‘నంది ఉత్తమ దర్శకుడు’(Nandi Best Director Award) అవార్డును కూడా సొంతం చేసుకున్నారు. దర్శకుడిగానే కాకుండా తెలుగులో సూపర్ హిట్ అయిన ‘మంగమ్మగారి మనవడు’ చిత్రానికి మూల కథను, ‘పల్నాటి పౌరుషం’(Palnati Paurusham) చిత్రానికి స్క్రీన్ప్లేను అందించి టాలీవుడ్తో తనకున్న బలమైన అనుబంధాన్ని చాటుకున్నారు.
తన సుదీర్ఘ కెరీర్లో ఎన్నో క్లాసిక్ చిత్రాలను తెరకెక్కించిన భారతీరాజా.. పరిశ్రమకు ఎందరో మేటి నటీనటులను పరిచయం చేశారు. రాధా, రాధికా, రేవతి, కార్తీక్ వంటి స్టార్ నటులు ఆయన స్క్రీన్ నుంచి వచ్చినవారే. సిగప్పు రోజక్కల్, కిజక్కే పోగుం రైల్, అలైగల్ ఓయ్వతిల్లై, ముదల్ మరియాదై, కరుత్తమ్మ వంటి సినిమాలు ఎప్పటికీ గుర్తుండిపోయే మాస్టర్పీస్లు.
అవార్డులు – పురస్కారాలు
భారతీయ సినిమాకు ఆయన చేసిన విశేష సేవలకు గుర్తింపుగా కేంద్ర ప్రభుత్వం 2004లో ఆయనను దేశ నాలుగో అత్యున్నత పౌర పురస్కారం ‘పద్మశ్రీ’తో (Padma Shri) సత్కరించింది. తన కెరీర్లో ఆయన 6 జాతీయ చలనచిత్ర పురస్కారాలు, 4 ఫిల్మ్ఫేర్ సౌత్ అవార్డులతో పాటు ఎన్నో రాష్ట్ర స్థాయి గౌరవాలను అందుకున్నారు.
కేవలం తెరవెనుకే కాకుండా, తెరముందు కూడా తన నటనతో అలరించారు భారతీరాజా. ఆయుధ ఎళుత్తు (యువ), పాండియా నాడు (పల్నాడు), తిరుచిత్రంబలం (తిరు), ఇటీవలి ‘మహారాజా’ వంటి చిత్రాల్లో కీలక పాత్రలు పోషించి నటుడిగానూ తనదైన ముద్ర వేశారు. నాలుగు దశాబ్దాలకు పైగా సినీ సామ్రాజ్యాన్ని ఏలిన ఈ ‘దర్శక శిఖరం’ కన్నుమూసినా, ఆయన అందించిన అద్భుత దృశ్యకావ్యాలు, పల్లెటూరి కథలు భారతీయ సినిమా చరిత్రలో చిరస్థాయిగా నిలిచిపోతాయని సినీ ప్రముఖులు కీర్తిస్తున్నారు.
