తెలంగాణలో (Telangana) భూముల మార్కెట్ విలువల (Land Market Values) పెంపుపై అధికార కాంగ్రెస్ (Congress) ప్రభుత్వంపై భారతీయ జనతా పార్టీ (BJP) తీవ్రస్థాయిలో విరుచుకుపడింది. ఎటువంటి ముందస్తు ప్రణాళిక, శాస్త్రీయత లేకుండా మార్కెట్ విలువలను ఇష్టారాజ్యంగా పెంచేసి ప్రజలపై మోయలేని భారం మోపారని తెలంగాణ బీజేపీ రాష్ట్ర అధ్యక్షుడు ఎన్. రాంచందర్ రావు (N. Ramchander Rao) మండిపడ్డారు. ఈ తుగ్లక్ నిర్ణయం వల్ల సామాన్య, మధ్యతరగతి ప్రజల సొంతింటి కల శాశ్వతంగా దూరమయ్యే ప్రమాదం ఏర్పడిందని ఆయన ఆందోళన వ్యక్తం చేశారు.
హైదరాబాద్లో (Hyderabad) శనివారం జరిగిన మీడియా సమావేశంలో రాంచందర్ రావు మాట్లాడుతూ కాంగ్రెస్ సర్కార్ విధానాలపై తీవ్ర విమర్శలు చేశారు. కొన్ని ప్రాంతాల్లో భూముల విలువలను ఏకంగా 300 శాతం వరకు పెంచడం దారుణమన్నారు. “రైతులకు(Farmers) న్యాయం చేయడాన్ని బీజేపీ ఎల్లప్పుడూ స్వాగతిస్తుంది. కానీ, దానిని సాకుగా చూపిస్తూ సామాన్య ప్రజలపై భారం మోపడం ఎంతవరకు సమంజసం?” అని ఆయన ప్రశ్నించారు. కేవలం రిజిస్ట్రేషన్ చార్జీల (Registration Charges) ద్వారా ప్రభుత్వ ఖజానా నింపుకోవడమే లక్ష్యంగా ఈ నిర్ణయం తీసుకున్నారని ఆరోపించారు. ఇప్పటికే కుదేలైన రియల్ ఎస్టేట్ రంగం.. ఈ తాజా పెంపుతో మరింత సంక్షోభంలోకి వెళ్తుందని హెచ్చరించారు.
స్లాట్ బుకింగ్స్ పైనా దెబ్బ
ప్రభుత్వం నిర్ణయించిన కనీస ధరల పట్టికను రాంచందర్ రావు తప్పుబట్టారు. ఎకరం కనీస ధరను రూ.2.75 లక్షలుగా నిర్ణయించడం సరికాదన్నారు. మున్సిపాలిటీల్లో కనీస ధర రూ.5 లక్షలు, హెచ్ఎండీఏ (HMDA) పరిధిలో రూ.10 లక్షలుగా నిర్దేశించడం వల్ల సామాన్యుడు భూమి కొనాలన్నా, ఇల్లు కట్టుకోవాలన్నా లక్షల రూపాయల అదనపు భారం పడుతుందని ఆవేదన వ్యక్తం చేశారు.
తెలంగాణలో (Telangana) కాంగ్రెస్ అధికారంలోకి వచ్చాక ప్రజలపై నిరంతరం ఆర్థిక భారం మోపుతోందని రాంచందర్ రావు విమర్శించారు. ఇప్పటికే కరెంట్ చార్జీలు, ఆర్టీసీ బస్సు ఛార్జీలు, ఆస్తి పన్నులు, నీటి చార్జీలు పెంచేసి బాదారని.. ఇప్పుడు ఎల్ఆర్ఎస్ (LRS) పేరుతో మరో పెద్ద ఆర్థిక భారాన్ని మోపుతున్నారని ఆగ్రహం వ్యక్తం చేశారు.
తక్షణమే పెంచిన భూముల మార్కెట్ విలువలను ప్రభుత్వం సమీక్షించాలని, అలాగే విద్యుత్, ఆర్టీసీ చార్జీలను తగ్గించాలని ఆయన డిమాండ్ చేశారు. ఒకవేళ ప్రభుత్వం ఈ ప్రజావ్యతిరేక నిర్ణయాలను వెనక్కి తీసుకోకపోతే, బీజేపీ సామాన్య ప్రజల పక్షాన నిలబడి రాష్ట్రవ్యాప్తంగా పెద్ద ఎత్తున ప్రజా పోరాటాలు, ఉద్యమాలు చేపడుతుందని రాంచందర్ రావు హెచ్చరించారు.
