న్యాయమూర్తుల నియామకాలు (Judges Appointments), పదోన్నతుల వ్యవస్థలో (Promotions System) మరింత పారదర్శకత అవసరమని సుప్రీంకోర్టు న్యాయమూర్తి (Supreme Court Judge) జస్టిస్ ఉజ్జల్ భుయాన్ (Justice Ujjal Bhuyan) అభిప్రాయపడ్డారు. కొలీజియం వ్యవస్థలో నియామకాలు, పదోన్నతులు, బదిలీలకు సంబంధించిన కారణాలను ప్రజలకు వెల్లడించకపోవడం వల్ల న్యాయవ్యవస్థకు తగని వ్యక్తులు కూడా జడ్జిలుగా వస్తున్నారని ఆయన వ్యాఖ్యానించారు.
“న్యాయవ్యవస్థలో పారదర్శకత”(Judiciary Transparency) అనే అంశంపై నిర్వహించిన సదస్సులో మాట్లాడిన జస్టిస్ ఉజ్జల్ భుయాన్, న్యాయమూర్తుల ఎంపిక ప్రక్రియ ప్రజల విశ్వాసాన్ని పెంచేలా ఉండాలని అన్నారు. గతంలో కొలీజియం (Collegium) తన నిర్ణయాలకు సంబంధించిన వివరాలను ప్రజలకు అందుబాటులో ఉంచేదని, ఇప్పుడు ఆ పద్ధతి కనిపించడం లేదని పేర్కొన్నారు.
న్యాయమూర్తుల నియామకాలు, పదోన్నతులు, బదిలీలకు సంబంధించి కొలీజియం (Collegium) అనుసరించిన కారణాలను ప్రజలకు తెలియజేయాల్సిన అవసరం ఉందన్నారు. కోర్టుల్లో ఏమి జరుగుతోంది, న్యాయమూర్తుల పనితీరు ఎలా ఉంది అనే విషయాలు తెలుసుకునే హక్కు ప్రజలకు ఉందని స్పష్టం చేశారు.
కొలీజియం నిర్ణయాల్లో పారదర్శకత లేకపోవడం వల్ల ప్రజలను చీమలతో పోల్చుతూ లేదా రాజ్యాంగ విలువలకు విరుద్ధంగా వ్యాఖ్యలు చేసిన వ్యక్తులు కూడా న్యాయమూర్తులుగా వస్తున్నారని ఆయన ఆందోళన వ్యక్తం చేశారు. అదే సమయంలో అత్యుత్తమ ప్రతిభ కలిగిన పలువురు న్యాయమూర్తులు పదోన్నతులకు దూరమవుతున్నారని చెప్పారు.
ఇటీవల ఒక హైకోర్టు న్యాయమూర్తి (High Court Judge) చేసిన వివాదాస్పద వ్యాఖ్యలపై కూడా కొలీజియం స్థాయిలో చర్చ జరగాల్సిన అవసరం ఉందని జస్టిస్ భుయాన్ సూచించారు.
అయితే, జస్టిస్ ఉజ్జల్ భుయాన్ వ్యాఖ్యలు ఇటీవల న్యాయమూర్తులు చేసిన కొన్ని వివాదాస్పద వ్యాఖ్యలను పరోక్షంగా ఉద్దేశించివేనని న్యాయ వర్గాల్లో చర్చ జరుగుతోంది. కొందరు ఇవి 2024లో అలహాబాద్ హైకోర్టు న్యాయమూర్తి చేసిన వ్యాఖ్యలకు సంబంధించినవిగా భావిస్తుండగా, మరికొందరు యువతను(Youth) “కాక్రోచ్లతో” (Cockroaches) పోల్చినట్లు వివాదానికి దారితీసిన జస్టిస్ సూర్యకాంత్ వ్యాఖ్యల నేపథ్యంలో చేసిన వ్యాఖ్యలుగా విశ్లేషిస్తున్నారు.
