ఆంధ్రప్రదేశ్ (Andhra Pradesh) రాష్ట్రానికి కీలకమైన నిర్ణయాలు తీసుకునే కేబినెట్ సమావేశం (Cabinet Meeting) నేడు జరగనుంది. ముఖ్యమంత్రి చంద్రబాబు నాయుడు (Chandrababu Naidu) అధ్యక్షతన ఉదయం 11 గంటలకు సచివాలయంలో జరిగే ఈ భేటీలో, పరిపాలనా సంస్కరణలు, రాజధాని అమరావతి అభివృద్ధి, పరిశోధన–విద్య–ఆరోగ్య రంగాల్లో పెట్టుబడులపై కీలక నిర్ణయాలు తీసుకునే అవకాశం ఉంది. ఈ సమావేశంపై ఇప్పటికే రాజకీయ, పరిపాలనా వర్గాల్లో ఆసక్తి నెలకొంది. ముఖ్యంగా కొత్త జిల్లాలు, మౌలిక సదుపాయాల అభివృద్ధి, ఫ్లడ్ కంట్రోల్ ప్రాజెక్టులపై కేబినెట్ కీలక ఆమోదాలు ఇవ్వనుంది.
కేబినెట్ ముందు కీలక అజెండా ఇదే.
ప్రజలకు సేవలు మరింత వేగంగా అందించాలనే లక్ష్యంతో 3 కొత్త జిల్లాలు (New Districts), పలు రెవిన్యూ డివిజన్లు (Revenue Divisions) ఏర్పాటు ప్రతిపాదనకు ఆమోదం లభించే అవకాశం ఉంది.
అమరావతి క్వాంటం కంప్యూటింగ్ సెంటర్ (Amaravati Quantum Computing Centre) ప్రాంగణంలో 2 ఎకరాల విస్తీర్ణంలో రూ.103.96 కోట్లతో అధునాతన పరిశోధనా కేంద్రం ఏర్పాటు చేయడానికి గ్రీన్ సిగ్నల్ ఇవ్వనున్నారు.
సచివాలయ పరిధిలోని అఖిల భారత సేవా అధికారుల (All India Services Officers) నివాస భవనాలకు అదనపు మౌలిక సదుపాయాల కోసం రూ.109 కోట్ల నిధుల కేటాయింపుకు ఆమోదం లభించనుంది.
అమరావతి పరిధిలోని శాఖమూరు గ్రామం (Shakamuru Village)లో 23 ఎకరాల భూమిలో కేంద్ర ఆయుష్ మంత్రిత్వ శాఖ (Ministry of AYUSH) ఆధ్వర్యంలో భవనాల నిర్మాణానికి ఆమోదం ఇవ్వనున్నారు.
రాజధాని ప్రాంతంలో పెట్టుబడులు, ఉపాధి అవకాశాలు పెంచేలా తుళ్లూరు (Tulluru)లో 6 ఎకరాల భూమిని హోటళ్లు, కన్వెన్షన్ సెంటర్లకు కేటాయించేందుకు నిర్ణయం తీసుకోనున్నారు.
వర్షాకాలంలో వరద ముప్పు నివారించేందుకు 8400 క్యూసెక్కుల సామర్థ్యంతో రూ.444 కోట్ల వ్యయంతో ఫ్లడ్ పంపింగ్ స్టేషన్ (Flood Pumping Station) నిర్మాణానికి కేబినెట్ ఆమోదం తెలపనుంది.
రాజధాని మాస్టర్ ప్లాన్ (Capital Master Plan)లో భాగంగా LPS జోన్-8 పరిధిలో లే అవుట్ల అభివృద్ధికి రూ.1358 కోట్ల నిధులు కేటాయించనున్నారు.
రాష్ట్రంలోని 202 ఎకరాల భూమి జరీబు (Wet Land) లేదా మెట్ట భూమి (Dry Land) అన్న నిర్ధారణ కోసం రాష్ట్ర స్థాయి కమిటీ ఏర్పాటు ప్రతిపాదనపై చర్చ జరగనుంది.
పలు సంస్థలకు భూముల కేటాయింపు, ఋషికొండ నిర్మాణాలు (Rushikonda Constructions) అంశంపై మంత్రివర్గంలో సమీక్ష జరగనుంది.
మెడికల్ కాలేజీ టెండర్లు (Medical College Tenders), PPP విధానం (Public Private Partnership)పై మంత్రులకు సీఎం చంద్రబాబు కీలక దిశానిర్దేశం ఇవ్వనున్నారు.
తాజా రాజకీయ పరిణామాలు, రాష్ట్ర అభివృద్ధి వ్యూహాలపై కూడా కేబినెట్లో చర్చించనున్నారు.
