భారత్-పాకిస్థాన్ (India-Pakistan) మధ్య ఇటీవలి సైనిక ఉద్రిక్తతలు, ముఖ్యంగా మే 7న భారత సైన్యం చేపట్టిన ‘ఆపరేషన్ సిందూర్’ (Operation Sindoor) తర్వాత, సోషల్ మీడియాలో అసత్య సమాచారం (False Information) వేగంగా వ్యాప్తి చెందుతోంది. ఈ ఆపరేషన్‌లో భారత్ పాకిస్థాన్‌లోని తొమ్మిది ఉగ్రవాద కేంద్రాలను లక్ష్యంగా చేసుకుని దాడులు చేసింది, ఇది ఏప్రిల్ 22న జమ్మూ కాశ్మీర్‌లోని పహల్గామ్‌లో 26 మంది పౌరుల మరణానికి కారణమైన ఉగ్రదాడికి ప్రతీకారంగా జరిగింది. అయితే, ఈ సంఘటనల నేపథ్యంలో నకిలీ వార్తలు సమాజంలో గందరగోళం సృష్టిస్తున్నాయి.
ఈ సంద‌ర్భంగా ఎక్స్‌లో ఓ వీడియో వైర‌ల్‌గా మారింది. భారత్‌పై పాకిస్తాన్ చేపట్టిన దాడులకు సంబంధించిన ఆధారాలు అడిగిన ఒక మహిళను కొందరు వ్యక్తులు దాడి చేసి, ఆమె దుస్తులు చించేశారు. ప్ర‌స్తుతం ఈ వీడియో వైర‌ల్‌గా మారింది. అయితే, ఈ ఘటనకు సంబంధించి ఏ న్యూస్ హౌస్ కూడా వార్తా క‌థ‌నాలు ప్రచురించలేదు. ఈ వాదన సోషల్ మీడియా పోస్ట్‌లలో మాత్రమే కనిపిస్తుంది, కానీ దీనిని ధృవీకరించే ఆధారాలు లేవు. ఇటువంటి అసత్య సమాచారం రెండు దేశాల మధ్య ఉద్రిక్తతలను మరింత పెంచే ప్రమాదం ఉంది.
ప్రెస్ ఇన్ఫర్మేషన్ బ్యూరో (పీఐబీ) ఫ్యాక్ట్ చెక్ యూనిట్ ఇటీవల పాకిస్థానీ హ్యాండిల్స్ ద్వారా వ్యాప్తి చేయబడిన నకిలీ వీడియోలను ఖండించింది, ఇందులో భారత సైనిక స్థావరాలను పాకిస్థాన్ ధ్వంసం చేసినట్లు తప్పుడు కామెంట్లు చేశారు. ఈ రకమైన ప్రచారం భయాందోళన సృష్టించడం, ప్రజలను తప్పుదారి పట్టించడం లక్ష్యంగా పనిచేస్తుందని పీఐబీ స్పష్టం చేసింది. అదేవిధంగా, వ్యక్తిగత హింస ఆరోపణలు కూడా ధృవీకరణ లేకుండా వ్యాప్తి చేయడం సమాజంలో అనవసర ఉద్రిక్తతలను రేకెత్తిస్తుంది.
🚨 Staged Video Alert 🚨
— PIB Fact Check (@PIBFactCheck) May 8, 2025
Fake video is being circulated by Pakistani handles alleging that an Indian Post was destroyed by the #Pakistani Army
🔍 #PIBFactCheck:
✅ The claim is completely false, and the video is staged
❌ There is no unit called “20 Raj Battalion" in the… pic.twitter.com/959rc9OrTH
ప్రజలు సోషల్ మీడియాలో వచ్చే సమాచారాన్ని నమ్మే ముందు, నమ్మకమైన వార్తా సంస్థలు లేదా అధికారిక మూలాల ద్వారా ధృవీకరించుకోవాలని నిపుణులు సూచిస్తున్నారు. భారత్-పాకిస్థాన్ ఉద్రిక్తతల నేపథ్యంలో, అసత్య సమాచారం శాంతిని భగ్నం చేసే ప్రమాదం ఉంది. ఈ సందర్భంలో, ప్రభుత్వాలు, మీడియా సంస్థలు, మరియు పౌరులు సమష్టిగా బాధ్యతాయుతంగా వ్యవహరించి, నిజమైన సమాచారాన్ని మాత్రమే పంచుకోవాలని కోరుతున్నారు.
పీఐబీ ఫ్యాక్ట్ చెక్ యూనిట్ ఎక్స్‌లో చేసిన పోస్ట్‌లో “నకిలీ వీడియో హెచ్చరిక! పాకిస్థానీ హ్యాండిల్స్ ద్వారా ఒక నకిలీ వీడియో వ్యాప్తి చేయబడుతోంది, ఇందులో భారత సైన్యం పోస్టును పాకిస్థాన్ సైన్యం ధ్వంసం చేసిందని పేర్కొంది. ఈ వాదన పూర్తిగా అబద్ధం, వీడియో నకిలీది. భారత సైన్యంలో ’20 రాజ్ బెటాలియన్’ అనే యూనిట్ ఏదీ లేదు. ఇది భయాందోళన సృష్టించడానికి, ప్రజలను తప్పుదారి పట్టించడానికి పాక్ చేస్తున్న ప్ర‌య‌త్నం అని పీఐబీ తెలిపింది. ఇదిలా ఉండగా, దేశవ్యాప్తంగా విమానాశ్రయాల్లో ప్రవేశంపై నిషేధం విధించబడిందని సోషల్ మీడియాలో వ్యాప్తి వైర‌ల్ అయిన ప్ర‌క‌ట‌న‌ను కూడా పీఐబీ ఖండించింది.
