డీలిమిటేషన్‌కు వైసీపీ మ‌ద్ద‌తు.. కానీ, కఠిన షరతులు

దేశవ్యాప్తంగా చర్చనీయాంశమైన నియోజకవర్గాల పునర్విభజన (Delimitation), మహిళా రిజర్వేషన్ బిల్లులపై వైఎస్సార్ కాంగ్రెస్ పార్టీ (YSRCP) కీలక నిర్ణయాలు తీసుకుంది. రాష్ట్ర ప్రయోజనాలే ప్రాతిపదికగా, ఎక్కడా దక్షిణాది రాష్ట్రాలకు అన్యాయం జరగకూడదనే లక్ష్యంతో వైసీపీ తన గళాన్ని వినిపిస్తోంది. మ‌హిళా బిల్లుకు ఫుల్ స‌పోర్టు అందించిన వైసీపీ.. డీలిమిటేష‌న్ బిల్లుకు మాత్రం కొన్ని ష‌ర‌తుల‌తో కూడిన మ‌ద్ద‌తు ఇస్తోంది.

ప్రధాని మోదీకి వైఎస్ జగన్ లేఖ
మాజీ ముఖ్యమంత్రి, వైసీపీ అధినేత వైఎస్ జగన్ మోహన్ రెడ్డి, ప్రధానమంత్రి నరేంద్ర మోదీకి రాసిన లేఖలో డీలిమిటేషన్ ప్రక్రియపై తన ఆందోళనలను, షరతులను స్పష్టంగా వివరించారు. కుటుంబ నియంత్రణ, జనాభా నియంత్రణలో దక్షిణాది రాష్ట్రాలు, ముఖ్యంగా ఆంధ్రప్రదేశ్ అత్యుత్తమ ప్రదర్శన కనబరిచాయని వివ‌రించారు. 1971 నుండి 2011 మధ్య కాలంలో దక్షిణాది రాష్ట్రాల జనాభా వాటా 24.80% నుంచి 20.88%కి తగ్గిందని, జనాభా ప్రాతిపదికన సీట్ల విభజన జరిగితే, క్రమశిక్షణతో జనాభాను నియంత్రించిన రాష్ట్రాలు పార్లమెంటులో ప్రాతినిధ్యాన్ని కోల్పోయే ప్రమాదం ఉందని జగన్ హెచ్చరించారు.

సీట్ల సంఖ్య తగ్గకూడదు
డీలిమిటేషన్ వల్ల ఏ ఒక్క రాష్ట్రానికి కూడా ప్రస్తుతం ఉన్న లోక్‌సభ, రాజ్యసభ సీట్ల వాటా తగ్గకూడదని ఆయన డిమాండ్ చేశారు. రాష్ట్రంలోని రాయలసీమ, కోస్తాంధ్ర, ఉత్తరాంధ్ర ప్రాంతాలకు సీట్ల కేటాయింపులో సమాన ప్రాధాన్యత ఉండాలని, అప్పుడే డీలిమిటేషన్‌కు సార్థకత ఉంటుందని స్పష్టం చేశారు. ఒక‌వేళ ప్రాంతాల మ‌ధ్య వైష‌మ్యాలు సృష్టించేలా సీట్లు పెంపు ఉంటే దానికి వ్య‌తిరేకంగా వైసీపీ పోరాటం చేస్తుంద‌ని హెచ్చ‌రించారు. “రాష్ట్ర ప్రయోజనాలు, దక్షిణాది రాష్ట్రాల ఆత్మగౌరవం దెబ్బతినకుండా డీలిమిటేషన్ జరగాలి” అనేదే వైసీపీ ప్రధాన ఉద్దేశంగా క‌నిపిస్తోంది.

లోక్‌సభలో వైసీపీ ఎంపీల గళం
కేంద్ర హోంమంత్రి ప్రకటన ప్రకారం ఆంధ్రప్రదేశ్‌లో ఎంపీ సీట్ల సంఖ్య 25 నుండి 38కి పెరిగే అవకాశం ఉన్నప్పటికీ, వైసీపీ ఎంపీలు పార్లమెంటు సాక్షిగా కొన్ని హెచ్చరికలు జారీ చేశారు. రాష్ట్రంలోని మూడు ప్రాంతాలకు (కోస్తా, రాయలసీమ, ఉత్తరాంధ్ర) సరైన విధంగా సీట్ల కేటాయింపు జరగాలి. ఏ ఒక్క ప్రాంతానికి అన్యాయం జరిగినా వైసీపీ చూస్తూ ఊరుకోబోదని, క్షేత్రస్థాయిలో పోరాటం చేస్తామని స్పష్టం చేశారు. రాజకీయ ప్రయోజనాల కంటే రాష్ట్ర సమగ్ర అభివృద్ధి, ప్రాతినిధ్యమే ముఖ్యమని పేర్కొన్నారు. జనాభా ప్రాతిపదికన కాకుండా, అభివృద్ధిని పరిగణనలోకి తీసుకుని సీట్ల కేటాయింపు జరగాలని జగన్ బలంగా కోరుతున్నారు.

మహిళా రిజర్వేషన్ బిల్లుకు పూర్తి మద్దతు
డీలిమిటేషన్ విషయంలో షరతులతో కూడిన మద్దతు తెలిపిన వైసీపీ, మహిళా రిజర్వేషన్ బిల్లుకు మాత్రం పూర్తిస్థాయిలో స్వాగతం పలికింది. చట్టసభల్లో మహిళలకు సరైన స్థానం దక్కడం ద్వారానే సామాజిక న్యాయం జరుగుతుందని పార్టీ విశ్వసిస్తోంది.