కర్ణాటక రాజకీయాల్లో సంచలనం రేపిన యోగేష్ గౌడ హత్య కేసులో కీలక తీర్పు వెలువడింది. 2016 జూన్ 15న ధారవాడ జిల్లా పంచాయతీ సభ్యుడు, బీజేపీ నాయకుడు యోగేష్ గౌడ హత్యకు గురైన ఘటనపై సీబీఐ సుదీర్ఘంగా దర్యాప్తు నిర్వహించింది. ఈ కేసులో మొత్తం 21 మందిని నిందితులుగా చేర్చుతూ దాదాపు 10 వేల పేజీల ఛార్జ్ షీట్ను సమర్పించింది. విచారణ అనంతరం కోర్టు ముగ్గురిని నిర్దోషులుగా ప్రకటించగా, 17 మందిని దోషులుగా తేల్చింది. ఈ కేసులో ధారవాడ కాంగ్రెస్ ఎమ్మెల్యే వినయ్ కులకర్ణి ప్రధాన నిందితుడిగా నిలిచారు.
దోషులుగా తేలిన వారిలో వినయ్ కులకర్ణితో పాటు మరో 15 మందికి కోర్టు యావజ్జీవ కారాగార శిక్ష విధించింది. అదనంగా, ఈ కేసులో భాగమైన ఇన్స్పెక్టర్ చిన్నకేశవకు ఏడు సంవత్సరాల జైలు శిక్ష విధించారు. ఈ తీర్పుతో కర్ణాటక రాజకీయ వర్గాల్లో చర్చలు మిన్నంటాయి. చట్టం ప్రకారం రెండేళ్లకు మించిన జైలు శిక్ష విధించబడిన ప్రజాప్రతినిధులు పదవికి అనర్హులు అవుతారు కాబట్టి, వినయ్ కులకర్ణి ఎమ్మెల్యే పదవిని కోల్పోనున్నారు. ఈ తీర్పు రాజకీయ నేతలపై న్యాయవ్యవస్థ కఠిన వైఖరిని మరోసారి స్పష్టం చేసింది.
