తమిళనాడు రాజకీయాల్లో సంచలనం సృష్టించిన దళపతి విజయ్ ఇప్పుడు బాక్సాఫీస్ వద్ద కూడా కొత్త చరిత్ర రాస్తున్నారు. ఆయన నటించిన తాజా చిత్రం ‘జననాయగన్’ థియేటర్లలో సందడి చేస్తుండగా, సినిమాలో కనిపించిన ప్రత్యేక టైటిల్ కార్డ్ సోషల్ మీడియాలో వైరల్గా మారింది. ఆ కార్డ్లో విజయ్ పేరుకు ముందు “తమిళనాడు గౌరవనీయ ముఖ్యమంత్రి సి. జోసెఫ్ విజయ్” అని ప్రదర్శించడంతో అభిమానులు ఉప్పొంగిపోతున్నారు. భారతీయ సినీ చరిత్రలో ఓ నటుడికి ‘ముఖ్యమంత్రి’ ట్యాగ్తో టైటిల్ కార్డ్ రావడం ఇదే తొలిసారి అంటూ ఫ్యాన్స్ గర్వంగా చెప్పుకుంటున్నారు. థియేటర్లలో ఈ సన్నివేశం వచ్చేసరికి కేకలు, డ్యాన్సులతో అభిమానులు హంగామా చేస్తున్నారు.
ఇటీవల జరిగిన తమిళనాడు అసెంబ్లీ ఎన్నికల్లో విజయ్ నేతృత్వంలోని టీవీకే పార్టీ 108 స్థానాలు గెలుచుకుని అతిపెద్ద పార్టీగా అవతరించడంతో, ఆయన రాజకీయ విజయాన్ని సినిమాలో కూడా ప్రతిబింబించేలా మేకర్స్ ఈ టైటిల్ కార్డ్ను జోడించినట్లు సమాచారం. హెచ్. వినోద్ దర్శకత్వంలో తెరకెక్కిన ఈ చిత్రంలో పూజా హెగ్డే, బాబీ డియోల్, మమిత బైజూ కీలక పాత్రల్లో నటించారు. ఎన్నికల కోడ్, రాజకీయ అంశాల కారణంగా వాయిదా పడిన ఈ సినిమా విడుదలైన తర్వాత భారీ స్పందన దక్కించుకుంటోంది. విజయ్ కెరీర్లో ఇదే చివరి సినిమా కావచ్చనే ప్రచారం కూడా సినిమాపై మరింత హైప్ తీసుకొచ్చింది.
