తెలంగాణ రాష్ట్రవ్యాప్తంగా గత కొన్ని రోజులుగా కురుస్తున్న భారీ వర్షాలతో నదులు, వాగులు, ఉపనదులు ఉప్పొంగి ప్రవహిస్తున్నాయి. ముఖ్యంగా తెలంగాణతో పాటు మహారాష్ట్ర ఎగువ ప్రాంతాల్లో నమోదైన భారీ వర్షాల ప్రభావంతో గోదావరి, ప్రాణహిత నదుల్లో వరద ప్రవాహం గణనీయంగా పెరిగింది. దీంతో రాష్ట్రంలోని ప్రధాన నీటిపారుదల ప్రాజెక్టుల్లోకి భారీగా వరద నీరు చేరుతుండటంతో జలాశయాలు వేగంగా నిండుతున్నాయి. నిజామాబాద్ జిల్లాలోని శ్రీరాంసాగర్ ప్రాజెక్టుకు ప్రస్తుతం 12,900 క్యూసెక్కుల ఇన్ఫ్లో నమోదవుతుండగా, నీటి నిల్వ 17.103 టీఎంసీలకు చేరుకుంది. కాకతీయ కాలువ ద్వారా 300 క్యూసెక్కుల నీటిని దిగువకు విడుదల చేస్తున్నారు. అలాగే నిర్మల్ జిల్లాలోని స్వర్ణ ప్రాజెక్టుకు దాదాపు 10 వేల క్యూసెక్కుల వరద నీరు చేరుతుండగా, జలాశయంలో నీటి నిల్వ అర టీఎంసీ దాటింది. కడెం ప్రాజెక్టుకు కూడా భారీగా వరద నీరు చేరుతుండటంతో ఉదయం 11 గంటల సమయానికి 77,442 క్యూసెక్కుల ఇన్ఫ్లో నమోదైంది. పరిస్థితిని దృష్టిలో ఉంచుకుని అధికారులు ఆరు గేట్లను ఎత్తి నీటిని దిగువకు విడుదల చేస్తున్నారు.
మరోవైపు జయశంకర్ భూపాలపల్లి జిల్లాలోని కాళేశ్వరం వద్ద ప్రాణహిత, గోదావరి నదులు ఉధృతంగా ప్రవహిస్తున్నాయి. గోదావరి నీటిమట్టం 6.320 మీటర్లకు చేరుకోవడంతో నది పరివాహక ప్రాంతాల్లో అప్రమత్తత కొనసాగుతోంది. వరద ఉధృతి పెరగడంతో మేడిగడ్డ లక్ష్మీ బ్యారేజ్కు భారీగా ఇన్ఫ్లో నమోదవుతోంది. ఎన్డీఎస్ఏ (NDSA) మార్గదర్శకాల మేరకు అధికారులు బ్యారేజ్కు చెందిన మొత్తం 85 గేట్లను ఎత్తి ఉంచి వరద నీటిని దిగువకు విడుదల చేస్తున్నారు. ప్రస్తుతం ఇన్ఫ్లో, అవుట్ఫ్లో రెండూ 1,01,530 క్యూసెక్కులుగా నమోదవుతున్నాయి. ప్రాజెక్టుల్లో నీటి నిల్వలు క్రమంగా పెరుగుతుండటం రైతుల్లో ఆశలు నింపుతుండగా, మరోవైపు ఎగువ ప్రాంతాల్లో వర్షాలు కొనసాగుతున్న నేపథ్యంలో నీటిపారుదల శాఖ అధికారులు పరిస్థితిని ఎప్పటికప్పుడు సమీక్షిస్తూ, దిగువ ప్రాంత ప్రజలు అప్రమత్తంగా ఉండాలని సూచిస్తున్నారు.
