విద్యాశాఖ మంత్రి నారా లోకేష్ కాకినాడ జిల్లా పర్యటనలో స్థానిక ప్రజాప్రతినిధులు, నేతలను పక్కనపెట్టిన తీరు చర్చనీయాంశంగా మారింది. కాకినాడ రూరల్ నియోజకవర్గంలోని తిమ్మాపురంలో చాగంటి కోటేశ్వరరావు నిర్వహించిన ‘భారతీయం’ కార్యక్రమానికి హాజరైన లోకేష్ ఉదయం నుంచి సాయంత్రం వరకు అక్కడే గడిపినా, స్థానిక నేతలకు మాత్రం అవకాశం దక్కలేదు.
దేశభక్తిని, నైతిక విలువలను విద్యార్థుల్లో పెంపొందించాలనే ఉద్దేశంతో తిమ్మాపురంలోని గోశాలలో ‘భారతీయం’ కార్యక్రమాన్ని నిర్వహించారు. సుమారు 500 మంది విద్యార్థులు, 60–70 మంది ఉపాధ్యాయులు ఈ కార్యక్రమంలో పాల్గొన్నారు. వారికి దేశభక్తి, నైతిక విలువలు, భారతీయ సంస్కృతి తదితర అంశాలపై శిక్షణ, బోధన కార్యక్రమాలు నిర్వహించారు.
ఈ కార్యక్రమానికి విద్యాశాఖ మంత్రి నారా లోకేష్ను స్వయంగా ఆహ్వానించినట్లు చాగంటి కోటేశ్వరరావు తెలిపారు. అపాయింట్మెంట్ తీసుకుని కార్యక్రమ వివరాలు చెప్పగానే లోకేష్ ఒక్క క్షణం కూడా ఆలోచించకుండా వస్తానని చెప్పారని, నిర్ణయించిన సమయానికంటే ముందుగానే తిమ్మాపురం గోశాలకు చేరుకున్నారని చాగంటి వివరించారు.
లోకేష్ ఉదయం నుంచి సాయంత్రం వరకు గోశాలలోనే ఉండి కార్యక్రమంలో పాల్గొన్నారు. అయితే ఆయన పర్యటనలో స్థానిక ప్రజాప్రతినిధులు, స్థానిక రాజకీయ నాయకులు, కార్యకర్తలకు పెద్దగా అవకాశం కల్పించలేదు. కార్యక్రమానికి రాజ్యసభ సభ్యుడు సానా సతీష్, పెద్దాపురం ఎమ్మెల్యే నిమ్మకాయల చిన్నరాజప్ప మాత్రమే ప్రధానంగా కనిపించారు.
మిగిలిన స్థానిక ప్రజాప్రతినిధులు, రెండు పార్టీలకు చెందిన ఎమ్మెల్యేలు, ఇతర ముఖ్య నాయకులు కార్యక్రమంలో కనిపించకపోవడం రాజకీయంగా చర్చకు దారితీసింది. మంత్రి ఒక రోజంతా జిల్లాలోనే ఉన్నప్పటికీ స్థానిక నేతలను కలుసుకునే కార్యక్రమం కూడా లేకపోవడం గమనార్హం.
మీడియాకూ దూరమే..
లోకేష్ పాల్గొన్న కార్యక్రమంలో స్థానిక మీడియాపైనా తీవ్ర ఆంక్షలు విధించారు. కార్యక్రమాన్ని కవర్ చేసేందుకు స్థానిక మీడియాకు పూర్తిస్థాయిలో అవకాశం ఇవ్వలేదు. అదే విధంగా స్థానిక కార్యకర్తలు కూడా మంత్రిని కలుసుకునే పరిస్థితి లేకుండా పోయింది. ఒకవైపు నైతిక విలువలు, సామాజిక బాధ్యత, భారతీయ సంస్కృతి గురించి రోజంతా బోధనలు సాగుతుండగా, మరోవైపు స్థానిక ప్రజాప్రతినిధులకు కనీస ప్రాధాన్యం దక్కకపోవడం రాజకీయ వర్గాల్లో చర్చకు కారణమైంది.
చాగంటికి వైసీపీ ప్రభుత్వంలో విశేష ప్రాధాన్యం
చాగంటి కోటేశ్వరరావు ఆధ్యాత్మిక, ధార్మిక కార్యక్రమాలకు వైసీపీ ప్రభుత్వం అధికారంలో ఉన్న సమయంలో విశేష ప్రాధాన్యం ఇచ్చింది. తిమ్మాపురంలో గోశాల ఏర్పాటుకు అవసరమైన భూమి విషయంలో అప్పటి ప్రభుత్వం సహకరించింది. గోశాల కోసం దేవాదాయ శాఖ నుంచి దాదాపు ఆరు ఎకరాల భూమిని లాంగ్లీజ్పై ఇచ్చేలా చర్యలు తీసుకుంది. అంతేకాదు, కంచి కామకోటి పీఠాధిపతి చాతుర్మాస దీక్ష కోసం తిమ్మాపురానికి వచ్చిన సమయంలో అవసరమైన మౌలిక వసతులను అప్పటి వైసీపీ ప్రభుత్వం సమకూర్చింది.
గోశాల పరిసరాల్లోని అప్రోచ్ రోడ్లు, విద్యుత్ సదుపాయాలు, వీధిదీపాలు, డ్రైన్లు సహా అవసరమైన మౌలిక సదుపాయాలను ప్రభుత్వం తరఫున ఏర్పాటు చేసింది. చాతుర్మాస దీక్షకు వచ్చిన భక్తులకు, స్వామీజీకి ఎలాంటి అసౌకర్యం కలగకుండా ప్రత్యేక ఏర్పాట్లు చేసింది.
అప్పటి స్థానిక ప్రజాప్రతినిధులు కూడా చాగంటి కోటేశ్వరరావు కార్యక్రమాలకు నిరంతరం సహకరించేవారు. అప్పటి టీటీడీ ఛైర్మన్ వైవీ సుబ్బారెడ్డి, ఆయన సతీమణి సహా పలువురు ప్రజాప్రతినిధులు అనేకసార్లు చాగంటి ఆశ్రమాన్ని సందర్శించారు. చాగంటి కోటేశ్వరరావు చేస్తున్న ఆధ్యాత్మిక, ధార్మిక కార్యక్రమాలకు ప్రభుత్వం నుంచి అవసరమైన సహకారం అందించడంతో పాటు, ఆయనకు తగిన గౌరవం ఇచ్చారు.
ఇప్పుడు ‘భారతీయం’ వేదికపై కొత్త రాజకీయం
అదే తిమ్మాపురం గోశాలలో ఇప్పుడు ‘భారతీయం’ పేరుతో నిర్వహించిన కార్యక్రమానికి లోకేష్ రోజంతా హాజరయ్యారు. దేశభక్తి, నైతిక విలువలను పెంపొందించే గొప్ప కార్యక్రమంగా దీనిని చాగంటి కోటేశ్వరరావు అభివర్ణించారు. కానీ మంత్రి పర్యటనలో స్థానిక ప్రజాప్రతినిధులు, నాయకులు, కార్యకర్తలకు దక్కిన ప్రాధాన్యమే ఇప్పుడు రాజకీయంగా చర్చకు వస్తోంది.
ప్రధాన ప్రశ్నలు.. వీటికి సమాధానాలేవీ..?
- సానా సతీష్ ఉంటే చాలు.. ఇంకెవ్వరూ అవసరం లేదా?
- జిల్లాలో ఎమ్మెల్యేలు, ఇతర ప్రజాప్రతినిధులు ఉన్నా వారిని ఎందుకు దూరంగా ఉంచారు?**
- మంత్రి రోజంతా కాకినాడ రూరల్లో ఉన్నా స్థానిక నేతలను ఎందుకు కలవలేదు?
- స్థానిక మీడియాపై ఎందుకు ఆంక్షలు పెట్టారు?
- నైతిక విలువల గురించి రోజంతా బోధనలు జరిగిన వేదిక చుట్టూనే స్థానిక ప్రజాప్రతినిధుల ప్రాధాన్యంపై ఇప్పుడు రాజకీయ చర్చ మొదలైంది.
