తెలంగాణ యువ క్రికెటర్లకు గుడ్న్యూస్ అందింది. హైదరాబాద్ క్రికెట్ అసోసియేషన్ (HCA) ప్రతిష్టాత్మకంగా చేపట్టిన ‘తెలంగాణ క్రికెట్ లీగ్’ (TG20)కు బీసీసీఐ అధికారిక ఆమోదం లభించింది. దీంతో రాష్ట్ర క్రికెట్లో కొత్త అధ్యాయం ప్రారంభమైనట్టైంది. గ్రామీణ ప్రాంతాల నుంచి పట్టణాల వరకు దాగి ఉన్న ప్రతిభావంతులైన ఆటగాళ్లకు ఈ లీగ్ భారీ వేదికగా మారనుంది.
టీఎన్పీఎల్, కేపీఎల్ తరహాలో నిర్వహించనున్న ఈ టోర్నీ ద్వారా యువ క్రికెటర్లు తమ టాలెంట్ను దేశవ్యాప్తంగా చాటుకునే అవకాశం పొందనున్నారు. ముఖ్యంగా ఐపీఎల్ వంటి మెగా లీగ్ల దృష్టిని ఆకర్షించే వేదికగా TG20 నిలవబోతుండటంతో తెలంగాణ క్రికెట్ అభిమానుల్లో భారీ ఉత్సాహం నెలకొంది.
హెచ్సీఏ కార్యదర్శి జీవన్ రెడ్డి మాట్లాడుతూ.. టీజీ20ను అత్యంత పారదర్శకంగా, అంతర్జాతీయ ప్రమాణాలతో నిర్వహిస్తామని స్పష్టం చేశారు. ప్రస్తుతం ఫ్రాంచైజీల ఎంపిక, ఆటగాళ్ల రిజిస్ట్రేషన్ ప్రక్రియ వేగంగా కొనసాగుతుండగా.. త్వరలో షెడ్యూల్, వేదికలు, ప్రైజ్ మనీ వివరాలు ప్రకటించనున్నారు.
ఫ్లడ్లైట్ల వెలుగులో జరిగే ఈ మ్యాచ్లు యువ ఆటగాళ్లకు ప్రొఫెషనల్ అనుభవాన్ని అందించనున్నాయి. మహమ్మద్ సిరాజ్లాంటి స్టార్ క్రికెటర్లను తెలంగాణ మట్టిలో నుంచి మరింతగా వెలికితీసే దిశగా TG20 కీలక అడుగుగా మారుతుందని క్రీడా విశ్లేషకులు అభిప్రాయపడుతున్నారు.
