రాయల్ ఛాలెంజర్స్ బెంగళూరు (ఆర్సీబీ)(RCB) ఐపీఎల్ ట్రోఫీ (IPL Trophy) విజయోత్సవంలో (Victory Celebration) భాగంగా జూన్ 4న చిన్నస్వామి స్టేడియం (Chinnaswamy Stadium) వద్ద జరిగిన తొక్కిసలాట కేసుపై సీఐడీ పోలీసులు (CID Police) జరిపిన దర్యాప్తులో షాకింగ్ నిజాలు బయటపడ్డాయి. ఈ దుర్ఘటనకు ప్రధాన కారణం విరాట్ కోహ్లీ (Virat Kohli) కోసం తొందరపడటమేనని సీఐడీ ప్రాథమిక నివేదికలో వెల్లడైంది.
దర్యాప్తు వివరాల ప్రకారం, ఆర్సీబీ సీఈఓ (RCB CEO) రాజేష్ మీనన్ (Rajesh Menon), మార్కెటింగ్ హెడ్ నిఖిల్ సోసలే (Nikhil Sosale) కర్ణాటక రాష్ట్ర క్రికెట్ కమిటీ (KSCA)పై ఒత్తిడి తెచ్చి, ఐపీఎల్ గెలిచిన మరుసటి రోజే కార్యక్రమాన్ని ఏర్పాటు చేయించారు. కార్యక్రమం ఆలస్యమైతే విరాట్ కోహ్లీ హాజరుకాలేడని, అతను బ్రిటన్కు వెళ్లాల్సి ఉంటుందని నిఖిల్ సోసలే ఒత్తిడి చేసినట్లు తేలింది. కర్ణాటక పోలీస్ డిపార్ట్మెంట్, KSCA వాయిదా వేయమని సూచించినా, ఆర్సీబీ అధికారులు అంగీకరించలేదు.
ఈ కార్యక్రమానికి ఉచిత టిక్కెట్లు ప్రకటించడం భారీ జనసందోహానికి కారణమైంది. భద్రతా ఏర్పాట్లు సరిపోకపోవడం, పోలీసులు గేట్ల వద్ద లేకపోవడం, సరైన రోల్ కాల్ లేకపోవడం వంటి భద్రతా లోపాలు తొక్కిసలాటకు దారితీశాయి. పోలీస్ డిపార్ట్మెంట్ దృష్టి విధానసౌధంలో జరిగిన మరో కార్యక్రమంపైనే ఎక్కువగా ఉందని, ఈ భారీ కార్యక్రమంపై తగిన శ్రద్ధ పెట్టలేదని సీఐడీ నివేదించింది. ప్రజలు లక్షల్లో వస్తారని అంచనా వేయడంలో విఫలమయ్యారు.
ఈ విషయాలన్నింటినీ సీఐడీ తన దర్యాప్తు నివేదికలో పొందుపరుస్తోంది. త్వరలోనే నివేదిక సమర్పించి, బాధ్యులపై చర్యలు తీసుకునే అవకాశం ఉంది.
