ఫిఫా వరల్డ్ కప్లో (FIFA World Cup) ఆతిథ్య జట్టు మెక్సికో (Mexico) చరిత్రాత్మక విజయాన్ని నమోదు చేసింది. ఎస్టాడియో అజ్టెకా (Estadio Azteca) వేదికగా జరిగిన రౌండ్ ఆఫ్ 32 మ్యాచ్లో ఈక్వెడార్ను 2-0 తేడాతో ఓడించి 40 ఏళ్ల తర్వాత నాకౌట్ (Knockout) మ్యాచ్లో గెలుపు రుచి చూసింది. మ్యాచ్ ప్రారంభం ఆలస్యమైనప్పటికీ హోమ్ అభిమానుల మద్దతుతో మెక్సికో (Mexico) తొలి నిమిషాల నుంచే దూకుడు ప్రదర్శించింది. జూలియన్ క్వినోనెస్ (Julián Quiñones) తొలి గోల్తో ఖాతా తెరవగా, వెంటనే రౌల్ జిమెనెజ్ (Raúl Jiménez) మరో గోల్ సాధించి జట్టుకు బలమైన ఆధిక్యం అందించాడు.
1986 వరల్డ్ కప్లో బల్గేరియాపై (Bulgaria) నాకౌట్ విజయం సాధించిన తర్వాత మళ్లీ ఇప్పుడు అదే అజ్టెకా స్టేడియంలో (Azteca Stadium) మెక్సికో చరిత్రను పునరావృతం చేసింది. వరుసగా ఏడు నాకౌట్ పరాజయాల తర్వాత వచ్చిన ఈ గెలుపుతో అభిమానులు సంబరాల్లో మునిగిపోయారు. మరోవైపు జర్మనీని ఓడించి సంచలనం సృష్టించిన ఈక్వెడార్ (Ecuador) ఈ మ్యాచ్లో నిరాశపరిచింది. రెండో అర్ధభాగంలో రెడ్ కార్డ్ కారణంగా 10 మంది ఆటగాళ్లతోనే ఆడాల్సి రావడంతో మ్యాచ్పై పట్టు కోల్పోయింది. ఇప్పుడు క్వార్టర్ ఫైనల్లో ఇంగ్లండ్ (England) లేదా డీఆర్ కాంగోతో మెక్సికో (Mexico) తలపడే అవకాశం ఉండటంతో ఆ జట్టు ప్రదర్శనపై ఆసక్తి నెలకొంది.
