అందమైన అమ్మాయిల పేరుతో నకిలీ సోషల్‌ మీడియా ఖాతాలు సృష్టించి, పోలీసు అధికారులను హనీట్రాప్‌లో చిక్కించి బ్లాక్‌మెయిల్‌కు పాల్పడిన అంతర్రాష్ట్ర సైబర్‌ నేరగాడి వ్యవహారం హైదరాబాద్‌లో కలకలం రేపింది. ఈ కేసులో ప్రధాన నిందితుడు కొండబత్తుల పవన్‌కుమార్‌ రావును హైదరాబాద్‌ సిటీ పోలీసులు అరెస్ట్‌ చేసినట్లు సమాచారం.
పోలీసుల దర్యాప్తు ప్రకారం.. నిందితుడు ఇన్‌స్టాగ్రామ్‌లో 33, ఫేస్‌బుక్‌లో 14 నకిలీ ప్రొఫైల్స్‌ సృష్టించి, అందమైన అమ్మాయిల ఫొటోలతో అధికారులకు ఫ్రెండ్‌ రిక్వెస్ట్‌లు పంపేవాడు. పరిచయం పెరిగిన తర్వాత వీడియో కాల్స్‌, వ్యక్తిగత సంభాషణల ద్వారా బాధితుల ప్రైవేట్‌ వీడియోలను రికార్డ్‌ చేయడం, వాటిని మార్ఫింగ్‌ చేసి సోషల్‌ మీడియాలో పెడతామని బెదిరించడం ద్వారా డబ్బులు వసూలు చేసేవాడని పోలీసులు గుర్తించినట్లు తెలుస్తోంది. ఈ ముఠా వలలో 82 మంది పోలీసు అధికారులు చిక్కినట్లు, ఇతర బాధితుల సంఖ్య కూడా భారీగా ఉన్నట్లు దర్యాప్తులో వెల్లడైంది.
ఈ వ్యవహారంలో ఖైరతాబాద్‌ డిటెక్టివ్‌ ఇన్‌స్పెక్టర్‌ బాలస్వామి ఉదంతం ప్రత్యేకంగా చర్చనీయాంశమైంది. ‘చందన’ అనే కల్పిత వ్యక్తితో పెళ్లి జరిపిస్తానని నమ్మించి, ఆమె వైద్య ఖర్చుల పేరుతో రూ.8 లక్షల నుంచి రూ.10 లక్షల వరకు వసూలు చేసినట్లు నిందితుడిపై ఆరోపణలు ఉన్నాయి. అంతేకాకుండా, వ్యక్తిగత జీవితాన్ని బయటపెడతానని బెదిరిస్తూ బాలస్వామిని మానసికంగా వేధించినట్లు ఫిర్యాదులో పేర్కొన్నారు. బాధితుడి భార్య ఫిర్యాదుతో ఈ వ్యవహారం వెలుగులోకి వచ్చినట్లు సమాచారం. ఈ కేసులో బాలస్వామి కూడా అరెస్టై రిమాండ్‌లో ఉన్నట్లు కథనం పేర్కొంటోంది. తెలుగు రాష్ట్రాలతో పాటు దేశంలోని ఇతర రాష్ట్రాలు, విదేశాల్లోనూ బాధితులు ఉన్నట్లు పోలీసులు అనుమానిస్తున్నారు. నిందితుడి ఎలక్ట్రానిక్‌ పరికరాలు, బ్యాంకు ఖాతాల వివరాలను పరిశీలిస్తూ, ఈ నెట్‌వర్క్‌లో మరెవరైనా ఉన్నారా అనే కోణంలో దర్యాప్తు కొనసాగిస్తున్నారు.
