తమిళ స్టార్, సీఎం విజయ్ నటించిన చివరి చిత్రం ‘జన నాయగన్’ భారీ అంచనాల మధ్య ప్రపంచవ్యాప్తంగా విడుదలై బాక్సాఫీస్ వద్ద శుభారంభం చేసింది. ట్రేడ్ ట్రాకర్ సాక్నిల్క్ అంచనా ప్రకారం, ఈ చిత్రం తొలి రోజే భారత్లో రూ.41 కోట్ల నెట్, రూ.48.27 కోట్ల గ్రాస్ వసూలు చేసింది. విదేశాల్లో మరో రూ.30 కోట్ల గ్రాస్ రాబట్టడంతో, తొలి రోజు ప్రపంచవ్యాప్తంగా మొత్తం రూ.78.27 కోట్ల గ్రాస్ కలెక్షన్లు నమోదు చేసింది.
భాషల వారీగా తమిళ వెర్షన్ రూ.36.50 కోట్లతో ప్రధాన వాటా అందుకోగా, తెలుగు వెర్షన్ రూ.2.75 కోట్లు, హిందీ వెర్షన్ రూ.1.75 కోట్ల వసూళ్లు సాధించాయి. భారీ హైప్కు తగ్గట్టుగానే ఈ సినిమా బాక్సాఫీస్ వద్ద మంచి ఆరంభాన్ని నమోదు చేసింది.
అయితే, విజయ్ కెరీర్లోని కొన్ని ఓపెనింగ్ రికార్డులను ‘జన నాయగన్’ అందుకోలేకపోయింది. గతంలో విడుదలైన ‘బీస్ట్’ తొలి రోజు రూ.49.30 కోట్ల నెట్, ‘గోట్’ రూ.44 కోట్ల నెట్ వసూలు చేయగా, ‘జన నాయగన్’ రూ.41 కోట్ల నెట్తో ఆ మార్కులను అధిగమించలేకపోయింది. అలాగే ‘లియో’, రజనీకాంత్ నటించిన ‘కూలీ’, ‘కూలీ 2.0’ వంటి చిత్రాల తొలి రోజు రికార్డులకు కూడా చేరుకోలేదు.
అయినప్పటికీ రాజకీయాల్లోకి అడుగుపెట్టే ముందు విజయ్ నటించిన చివరి సినిమా కావడంతో వీకెండ్లో ఈ మూవీ కలెక్షన్లు మరింత పెరిగే అవకాశం ఉందని ట్రేడ్ వర్గాలు భావిస్తున్నాయి. అభిమానుల స్పందన కొనసాగితే బాక్సాఫీస్ వద్ద ఈ చిత్రం మరింత బలమైన వసూళ్లు నమోదు చేసే అవకాశాలు కనిపిస్తున్నాయి.
