భారతదేశంలో ఉపగ్రహ ఆధారిత ఇంటర్నెట్ (శాటిలైట్ ఇంటర్నెట్) సేవలు అందించే స్టార్‌లింక్ (Starlink) ప్రవేశంపై నిలిచిపోయిన విచారణలు, అనుమతులపై స్పేస్‌ఎక్స్ అధినేతి ఎలన్ మస్క్ చేసిన వ్యాఖ్యలు ప్రపంచవ్యాప్తంగా తీవ్ర చర్చనీయాంశంగా మారాయి. సోషల్ మీడియా వేదికగా ఆయన చేసిన వ్యాఖ్యలు భారత టెలికామ్ రంగంలో సంచలనం సృష్టిస్తున్నాయి.
ఎలన్ మస్క్ ఏమన్నారు?
X (ట్విట్టర్) లో ఒక యూజర్ వేసిన పోస్ట్‌కు సమాధానమిస్తూ మస్క్ తీవ్ర స్థాయిలో ధ్వజమెత్తారు. “దురదృష్టవశాత్తు, భారత ప్రజలపై తమ గుత్తాధిపత్యాన్ని కొనసాగించడానికి కొందరు కుబేరులు మాకు అడ్డంకులు సృష్టిస్తున్నారు. వారు ఎవరో మీరు సులభంగా ఊహించగలరు.. ఇది భారత ప్రజలకు వ్యతిరేకంగా జరుగుతున్న నేరం!.. భారతదేశంలో స్టార్‌లింక్ అందుబాటులోకి వస్తే.. ప్రస్తుతం ఇంటర్నెట్ ధరలను భరించలేని వారికి, అసలు ఇంటర్నెట్ కనెక్షనే లేని దూరప్రాంత ప్రజలకు అధిక వేగంతో కూడిన, చవ‌క అయిన ఇంటర్నెట్ సేవలు అందుతాయి” అని ఎలన్ మస్క్ స‌మాధాన‌మిచ్చారు.
ఎవరిని ఉద్దేశించి ఈ వ్యాఖ్యలు?
మస్క్ నేరుగా ఎవరి పేరునూ ప్రస్తావించకపోయినా, ఆయన ఆరోపణలు భారతీయ టెలికామ్ దిగ్గజాలైన రిలయన్స్ జియో (ముకేష్ అంబానీ), ఎయిర్‌టెల్ (సునీల్ భారతి మిట్టల్) లను ఉద్దేశించినవేనని అంతర్జాతీయ విశ్లేషకులు భావిస్తున్నారు. భారతదేశ బ్రాడ్‌బ్యాండ్ మార్కెట్‌లో 80 శాతానికి పైగా వాటా ఈ రెండు సంస్థల చేతిలోనే ఉంది. శాటిలైట్ స్పెక్ట్రమ్ కేటాయింపులు, ధరలు, విదేశీ శాటిలైట్ నెట్‌వర్క్‌ల ప్రవేశానికి సంబంధించిన నిబంధనలపై స్పేస్‌ఎక్స్, ఈ టెలికామ్ దిగ్గజాల మధ్య చాలా కాలంగా వివాదం నడుస్తోంది.
స్టార్‌లింక్ ప్రవేశానికి అసలు అడ్డంకి ఏంటి?
శాటిలైట్ స్పెక్ట్రమ్‌ను వేలం ద్వారా కాకుండా అడ్మినిస్ట్రేటివ్ పద్ధతిలో కేటాయించాలని స్టార్‌లింక్ కోరగా, జియో వంటి సంస్థలు మునుపటి వేలంలో తాము వేల కోట్లు వెచ్చించామని, శాటిలైట్ కంపెనీలకు కూడా సమాన పోటీ వాతావరణం ఉండాలని డిమాండ్ చేశాయి.
కేంద్ర హోం మంత్రిత్వ శాఖ పరిధిలోని భద్రతా సంస్థల నుంచి అనుమతులు పొందడం, డేటా స్థానికీకరణ, ఇతర నిబంధనల ప్రక్రియలో జాప్యం జరగడం దీనికి ప్రధాన కారణంగా తెలుస్తోంది.
మస్క్ చేసిన ఆరోపణలను కేంద్ర ప్రభుత్వం తోసిపుచ్చింది. భారత శాటిలైట్ విధానం పారదర్శకంగా, నిష్పాక్షికంగా ఉందో లేదో చూస్తున్నామని, దేశ భద్రతా ప్రమాణాలకు అనుగుణంగానే అనుమతుల ప్రక్రియ సాగుతుందని తెలిపింది. ఐదేళ్లుగా భారత నియంత్రణ సంస్థలతో పనిచేస్తున్నామని, దేశీయ డేటా నిబంధనలకు కట్టుబడి పనిచేయడానికి తాము సిద్ధంగా ఉన్నామని స్టార్‌లింక్ బిజినెస్ ఆపరేషన్స్ వైస్ ప్రెసిడెంట్ లోరెన్ డ్రేయర్ వెల్లడించారు.
మొత్తానికి, భారత్‌లో కోట్లాది మంది వినియోగదారులకు శాటిలైట్ ఇంటర్నెట్ అందించాలనే స్టార్‌లింక్ ప్రయత్నం.. దేశీయ టెలికామ్ దిగ్గజాలు, అంతర్జాతీయ టెక్ దిగ్గజాల మధ్య రసవత్తర సమరానికి దారితీసింది.
