అండర్వరల్డ్ డాన్, మోస్ట్ వాంటెడ్ ఉగ్రవాది దావూద్ ఇబ్రహీంకు (Dawood Ibrahim) మహారాష్ట్ర ప్రభుత్వం (Maharashtra Government) గట్టి షాక్ ఇచ్చింది. దక్షిణ ముంబైలోని(South Mumbai) భేండీ బజార్లో(Bhendi Bazaar) దావూద్ పూర్వీకులు నివసించిన, అతను అక్రమంగా ఆక్రమించుకున్న 162 ఏళ్ల నాటి పురాతన భవనాన్ని బృహన్ ముంబై మున్సిపల్ కార్పొరేషన్ (BMC) బుల్డోజర్లతో పునాదులతో సహా నేలమట్టం చేసింది. బాంబే హైకోర్టు (Bombay High Court)ఆదేశాల మేరకు, భారీ పోలీసు బందోబస్తు మధ్య ఈ కూల్చివేత ప్రక్రియ పూర్తయింది.
1864లో ప్రయాణికుల వసతి కోసం నిర్మించిన ‘హాజీ ఇస్మాయిల్ హాజీ హబీబ్ ముసాఫిర్ఖానా’ (Haji Ismail Haji Habib Musafirkhana) భవనంలోని రెండో అంతస్తులో దావూద్ తండ్రి హెడ్ కానిస్టేబుల్ ఇబ్రహీం కస్కర్ (Ibrahim Kaskar) తన కుటుంబంతో కలిసి అద్దెకు ఉండేవారు. 1970-80 దశకాల్లో ముంబై అండర్వరల్డ్లో దావూద్ ప్రాబల్యం పెరిగాక, అద్దె చెల్లించడం మానేసి రెండో అంతస్తు మొత్తాన్ని కబ్జా చేశాడు. 1986లో భారత్(India) విడిచి పారిపోయే వరకు ఈ భవనాన్ని తన నివాసంగా, అండర్వరల్డ్ కార్యకలాపాలకు ప్రధాన కేంద్రంగా మార్చుకున్నాడు.
1993 ముంబై వరుస బాంబు పేలుళ్ల (1993 Mumbai Serial Bomb Blasts) కుట్రకు కూడా ఈ భవనం కేంద్రంగా నిలిచింది. దీంతో టాడా (TADA) కోర్టు దీనిని జప్తు చేసింది. ఆ తర్వాత కేంద్ర ప్రభుత్వం స్మగ్లర్స్ అండ్ ఫారిన్ ఎక్స్ఛేంజ్ మానిప్యులేటర్స్ యాక్ట్ (SAFEMA) కింద ఈ ఆస్తిని స్వాధీనం చేసుకునేందుకు చర్యలు చేపట్టింది. దీనిపై దావూద్ తల్లి అమీనా బీ(Ameena Bi), సోదరి హసీనా పార్కర్ (Haseena Parkar) సుప్రీంకోర్టు వరకు వెళ్లినా, 2018లో అత్యున్నత న్యాయస్థానం వారి పిటిషన్ను కొట్టివేస్తూ ప్రభుత్వానికి అనుకూలంగా తీర్పునిచ్చింది.
మరోవైపు, ఈ భవనానికి అసలైన యజమాని అయిన ముసాఫిర్ఖానా ట్రస్ట్, శిథిలావస్థలో ఉన్న ఈ కట్టడాన్ని 2015లో ‘సైఫీ బుర్హానీ అప్లిఫ్ట్మెంట్ ట్రస్ట్’కు (Saifee Burhani Upliftment Trust) విక్రయించింది. అత్యంత ప్రమాదకరంగా మారిన ఈ భవనాన్ని కూల్చివేసేందుకు ఆగస్టు 2020లో హైకోర్టు అనుమతి ఇచ్చింది. గతంలోనే పై అంతస్తులను తొలగించిన బీఎంసీ (BMC) అధికారులు, తాజాగా రోడ్డు విస్తరణ మరియు భద్రతా కారణాల దృష్ట్యా మిగిలిన భాగాన్ని, గ్రౌండ్ ఫ్లోర్ను పూర్తిగా నేలమట్టం చేశారు. దీంతో ముంబై గడ్డపై దావూద్ ఇబ్రహీంకు చెందిన చివరి ఆనవాలు కూడా చరిత్రలో కలిసిపోయింది.








