ఆస్ట్రేలియా మాజీ స్టార్ ఓపెనర్ డేవిడ్ వార్నర్ మరోసారి వివాదంలో నిలిచారు. మద్యం సేవించి వాహనం నడిపిన (డ్రంక్ అండ్ డ్రైవ్) కేసులో ఆయన కోర్టు ఎదుట తన నేరాన్ని అంగీకరించారు. దీంతో ఈ కేసులో శిక్ష ఖరారు చేసేందుకు కోర్టు ఆగస్టు 18 తేదీని నిర్ణయించింది. ఈ పరిణామం వార్నర్ వ్యక్తిగత జీవితంతో పాటు క్రికెట్ కెరీర్పైనా ప్రభావం చూపే అవకాశం ఉందనే చర్చ మొదలైంది. ముఖ్యంగా సిడ్నీ థండర్ కెప్టెన్గా ఆయన కొనసాగుతారా? అనే అంశంపై ఇప్పుడు క్రికెట్ వర్గాల్లో ఉత్కంఠ నెలకొంది.
ఈ ఘటన ఈ ఏడాది ఏప్రిల్ 5న చోటుచేసుకుంది. పాకిస్తాన్ సూపర్ లీగ్ (PSL) నుంచి ఆస్ట్రేలియాకు తిరిగి వచ్చిన వార్నర్ను సిడ్నీ పోలీసులు తనిఖీ కోసం ఆపి బ్రీత్లైజర్ పరీక్ష నిర్వహించారు. ఆ పరీక్షలో ఆయన రక్తంలోని ఆల్కహాల్ స్థాయి 0.104గా నమోదైనట్లు అధికారులు వెల్లడించారు. ఇది అక్కడి చట్టబద్ధ పరిమితికి రెండింతలకు పైగా ఉండటంతో కేసు నమోదు చేశారు. కోర్టులో ఆయన తరఫు న్యాయవాది మాట్లాడుతూ, ఘటనకు ముందు మూడు గ్లాసుల వైన్ తాగినట్లు, టాక్సీ లేదా ఉబెర్ ఉపయోగించాల్సిందని తెలిసినా తానే డ్రైవ్ చేయడం పెద్ద తప్పు అని వార్నర్ గుర్తించారని తెలిపారు. తన చర్యపై ఆయన తీవ్ర పశ్చాత్తాపం వ్యక్తం చేస్తున్నారని కూడా వెల్లడించారు.
డ్రంక్ అండ్ డ్రైవ్ కేసు నేపథ్యంలో సిడ్నీ థండర్ కెప్టెన్సీపై కూడా అనుమానాలు వ్యక్తమవుతున్నాయి. అయితే ఇప్పటివరకు జట్టు యాజమాన్యం ఎలాంటి అధికారిక ప్రకటన చేయలేదు. మరోవైపు క్రికెట్ NSW ఈ ఘటనను అత్యంత తీవ్రంగా పరిగణిస్తున్నట్లు తెలిపింది. మద్యం సేవించి వాహనం నడపడాన్ని ఎప్పటికీ సమర్థించబోమని స్పష్టం చేసింది. గతంలో 2018 బాల్ ట్యాంపరింగ్ వివాదం కారణంగా నాయకత్వ నిషేధాన్ని ఎదుర్కొన్న వార్నర్, 2024లో ఆ నిషేధం తొలగిన తర్వాత సిడ్నీ థండర్ కెప్టెన్గా బాధ్యతలు చేపట్టారు. ఇప్పుడు ఆగస్టు 18న వెలువడనున్న కోర్టు తీర్పుతో పాటు, క్రికెట్ అధికారుల నిర్ణయం కూడా ఆయన కెరీర్కు కీలకంగా మారనుంది.
