హైదరాబాద్ నగరంలో ఈ నెల 13, 14 తేదీల్లో నిర్వహించనున్న ప్రతిష్ఠాత్మక ‘భారత్ సమ్మిట్-2026’కు సన్నాహాలు శరవేగంగా జరుగుతున్నాయి. ముఖ్యమంత్రి రేవంత్ రెడ్డి నాయకత్వంలో తెలంగాణ ప్రభుత్వం ఈ సమ్మిట్‌ను అత్యంత ప్రతిష్ఠాత్మకంగా నిర్వహిస్తోందని డిప్యూటీ సీఎం మల్లు భట్టి విక్రమార్క తెలిపారు. ప్రపంచవ్యాప్తంగా విద్వేష రాజకీయాలు, సామాజిక విభజన పెరుగుతున్న తరుణంలో ప్రజాస్వామ్యవాదులు, ప్రగతిశీల భావాలు కలిగిన వారిని ఒకే వేదికపైకి తెచ్చి నూతన దిశానిర్దేశం చేయడమే ఈ సమ్మిట్ ప్రధాన లక్ష్యం. ఈ కార్యక్రమానికి 70కి పైగా దేశాల నుంచి 1,000 మందికి పైగా ప్రజాప్రతినిధులు, విధాన రూపకర్తలు, మేధావులు హాజరుకానున్నారు.
మహాత్మా గాంధీ బోధించిన అహింసా మార్గం, నెహ్రూ ప్రవచించిన అలీన విదేశాంగ విధానం, మిశ్రమ ఆర్థిక విధానాల ప్రాధాన్యతను ప్రపంచానికి చాటిచెప్పేలా ఈ సదస్సు సాగనుంది. ఈ సందర్భంగా డిప్యూటీ సీఎం మాట్లాడుతూ.. ప్రజాస్వామ్యంలో అధికార, ప్రతిపక్షాలు శత్రువులు కాదని, కేవలం రాజకీయ ప్రత్యర్థులు మాత్రమేనని స్పష్టం చేశారు. భిన్నాభిప్రాయాలను గౌరవిస్తూ ప్రతిపక్షాల గొంతుకను పరిరక్షించడమే అసలైన ప్రజాస్వామ్య సూత్రమని పేర్కొంటూ, అన్ని పార్టీల నాయకులను ఈ చర్చకు ఆహ్వానించారు. ఆర్థిక విధానాలకు దావోస్ వేదికైనట్లే, సామాజిక-రాజకీయ చర్చలకు హైదరాబాద్ అంతర్జాతీయ వేదికగా మారనుందని తెలిపారు. 80వ స్వాతంత్ర్య దినోత్సవం, నెహ్రూ జయంతి వేళ జరుగుతున్న ఈ సమ్మిట్‌ను విజయవంతం చేయడానికి మీడియా విస్తృత ప్రచారం కల్పించాలని కోరారు.
‘నువ్వు పోయాక నీ కొడుకు పరిస్థితి ఆలోచించావా? నాకే బాధేస్తోంది’