కోల్‌కతా నుంచి ముంబై వెళ్లాల్సిన ఎయిర్ ఇండియా విమానానికి హైజాక్ బెదిరింపు రావడం కలకలం రేపింది. ఎయిర్ ఇండియాకు చెందిన AI 2772 విమానం బుధవారం ఉదయం 10:20 గంటలకు కోల్‌కతా నుంచి ముంబై బయలుదేరాల్సి ఉంది. అయితే టేకాఫ్‌కు సిద్ధమవుతున్న సమయంలో విమానంలోని టాయిలెట్‌లో హైజాక్ బెదిరింపు సందేశాన్ని సిబ్బంది గుర్తించారు.
A320 రకానికి చెందిన VT-TNH విమానం హోల్డింగ్ పాయింట్ వద్ద ఉండగా బెదిరింపు సందేశం బయటపడింది. వెంటనే అప్రమత్తమైన భద్రతా సిబ్బంది విమానాన్ని కోల్‌కతా విమానాశ్రయంలోని ఐసోలేషన్ బేకు తరలించారు. విమానంలో ప్రయాణికులు, సిబ్బంది కలిపి మొత్తం 108 మంది ఉన్నట్లు ప్రాథమిక వివరాలు వెల్లడిస్తున్నాయి.
బెదిరింపు నేపథ్యంలో భద్రతా బృందాలు విమానాన్ని తనిఖీ చేస్తున్నాయి. సందేశాన్ని ఎవరు రాశారు? బెదిరింపు వెనుక ఉద్దేశం ఏమిటి? అనే అంశాలపై అధికారులు దర్యాప్తు చేపట్టారు. ఈ ఘటనతో విమానాశ్రయంలో భద్రతను కట్టుదిట్టం చేశారు.
గతంలోనూ భారత్‌లో పలు విమానాల హైజాక్ ఘటనలు చోటుచేసుకున్నాయి. ముఖ్యంగా 1999లో ఖాట్మండు నుంచి ఢిల్లీ వెళ్తున్న ఇండియన్ ఎయిర్‌లైన్స్ IC 814 విమానాన్ని హైజాక్ చేసి కాందహార్‌కు తరలించిన ఘటన దేశవ్యాప్తంగా సంచలనం సృష్టించింది.
తాజా ఘటనలో మాత్రం ఇప్పటివరకు విమానం హైజాక్ అయినట్లు నిర్ధారణ కాలేదు. బెదిరింపు సందేశం వెలుగులోకి రావడంతో ముందుజాగ్రత్త చర్యల్లో భాగంగా అధికారులు విమానాన్ని ప్రత్యేక ప్రాంతానికి తరలించారు.
‘నువ్వు పోయాక నీ కొడుకు పరిస్థితి ఆలోచించావా? నాకే బాధేస్తోంది’