బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ సీఎం రేవంత్ పై తీవ్ర ఆరోపణలు చేశారు. రేవంత్‌రెడ్డి ఒక ‘ఈఎంఐ ముఖ్యమంత్రి’ అని ఎద్దేవా చేస్తూ, కాంగ్రెస్‌ అధిష్ఠానానికి కిస్తీలు చెల్లించకపోతే పదవి పోతుందనే భయంతో ఉన్నారని విమర్శించారు. అధిష్ఠానానికి చెల్లింపుల కోసమే విదేశీ బొగ్గు కొనుగోళ్లలో కమీషన్ల ద్వారా నిధులు సమకూర్చుకునే ప్రయత్నం చేస్తున్నారని ఆరోపించారు. సింగరేణిని అడ్డుపెట్టుకుని టెండర్లు, కమీషన్ల వ్యవహారాలు నడుపుతున్నారన్న కేటీఆర్‌.. విదేశీ బొగ్గు కొనుగోళ్లు, సింగరేణి అక్రమాలు, సౌర విద్యుత్‌ వ్యవహారాలపై సిట్టింగ్‌ జడ్జితో విచారణ జరిపించాలని డిమాండ్‌ చేశారు.
గోదావరి జలాల వినియోగం, ఎల్‌నినోపై ప్రభుత్వ వైఖరిని కూడా కేటీఆర్‌ ప్రశ్నించారు. సుమారు వెయ్యి టీఎంసీల గోదావరి జలాలు సముద్రంలోకి వృథాగా వెళ్లిపోయినా ప్రభుత్వం ముందస్తు చర్యలు తీసుకోలేదని ఆరోపించారు. మేడిగడ్డ బ్యారేజీ వద్ద కన్నెపల్లి నుంచి దిగువకు వెళ్తున్న నీటిని ఎత్తిపోసేందుకు చర్యలు చేపట్టకుండా, ఇప్పుడు సాగునీరు, తాగునీటి కొరతకు ఎల్‌నినోను కారణంగా చూపుతోందని విమర్శించారు. నీటి నిర్వహణలో వైఫల్యానికి ప్రభుత్వం బాధ్యత వహించాలని డిమాండ్‌ చేశారు. మరోవైపు, కాంగ్రెస్‌ పాలనపై గ్రాడ్యుయేట్లు, నిరుద్యోగుల్లో అసంతృప్తి ఉందని పేర్కొన్న కేటీఆర్‌.. రానున్న గ్రాడ్యుయేట్‌ ఎమ్మెల్సీ ఎన్నికల్లో ఆ పార్టీకి ప్రజలు సమాధానం చెబుతారని వ్యాఖ్యానించారు.
సహకార సంఘాల ఎన్నికలు, రైతుల రుణాల సమస్యలపైనా కేటీఆర్‌కు విజ్ఞప్తులు అందాయి. రాష్ట్రంలోని సహకార సంఘాలు, సహకార బ్యాంకులకు వెంటనే ఎన్నికలు నిర్వహించాలని వివిధ జిల్లాల ప్రాథమిక వ్యవసాయ సహకార సంఘాల అధ్యక్షులు కోరారు. పాలకవర్గాలు లేకపోవడంతో రైతులకు పంట రుణాల మంజూరులో ఇబ్బందులు ఎదురవుతున్నాయని, రూ.10 లక్షలకు మించిన రుణాల మంజూరులోనూ సమస్యలు తలెత్తుతున్నాయని వివరించారు. ఐఐటీలు, ఐఐఎంలలో ప్రవేశాలు పొందిన విద్యార్థులకు విద్యా రుణాలు అందడంలోనూ ఇబ్బందులు ఉన్నాయని తెలిపారు. ఈ సమస్యల పరిష్కారానికి సహకార సంఘాల ఎన్నికలు నిర్వహించేలా ప్రభుత్వంపై ఒత్తిడి తీసుకురావాలని కోరగా, ఎన్నికల నిర్వహణకు తమ వంతు సహకారం అందిస్తామని కేటీఆర్‌ హామీ ఇచ్చారు.
