భారతీయ సినీ యవనికపై తనదైన నటనతో చెరగని ముద్ర వేసిన సీనియర్, విలక్షణ నటుడు నానా పటేకర్ (75) గురువారం ఉదయం గోవాలో కన్నుమూశారు. తీవ్ర గుండెపోటు రావడంతో ఆయన తుదిశ్వాస విడిచినట్లు వైద్యులు, కుటుంబ సభ్యులు ధ్రువీకరించారు. ఆయన హఠాన్మరణంతో బాలీవుడ్ సహా ముంబై, సౌత్ సినీ రంగాలు తీవ్ర దిగ్భ్రాంతికి గురయ్యాయి.
నటనకే నటన నేర్పిన నటుడిగా నానా పటేకర్ సంపాదించుకున్న గుర్తింపు సాటిలేనిది. విలన్ అయినా, సైకో పాత్ర అయినా, ఉద్వేగభరితమైన సెంటిమెంట్ అయినా, నవ్వులు పూయించే కామెడీ అయినా.. నానా పటేకర్ ఒక పాత్రలో ఒదిగిపోతే అక్కడ మరొక నటుడిని ఊహించుకోవడం కూడా అసాధ్యం.
నాలుగు దశాబ్దాల సుదీర్ఘ సినీ ప్రస్థానంలో ఆయన ఎప్పుడూ పెద్ద బ్యానర్లు, స్టార్ హీరోల ఇమేజ్‌ను చూడలేదు. కేవలం కథ, తన పాత్రలోని ప్రాధాన్యతను మాత్రమే నమ్ముకున్నారు. ఆవేశం, తీవ్రత, విలక్షణమైన ముఖకవళికలతో కూడిన ఆయన సంభాషణల శైలి (డైలాగ్ డెలివరీ) భారతీయ సినిమాలో ఒక ప్రత్యేక అధ్యాయం.
నానా పటేకర్ అసలు పేరు విశ్వనాథ్ పటేకర్. 1951 జనవరి 1న మహారాష్ట్రలోని మురుడ్-జంజీరాలో జ‌న్మించారు. సినిమా అంటే పిచ్చి అభిమానంతో 1978లో ‘గమన్’ చిత్రంతో సినీ రంగ ప్రవేశం చేశారు. హిందీతో పాటు మరాఠీ చిత్రాల్లోనూ ఎన్నో అద్భుతమైన పాత్రలు చేశారు. ‘పరిందా’, ‘క్రాంతివీర్’, ‘అగ్ని సాక్షి’, ‘ఖామోషీ’, ‘తిరంగా’, ‘ప్రహార్’ వంటి చిత్రాలతో ప్రత్యేక గుర్తింపు తెచ్చిపెట్టాయి.
మూడు జాతీయ అవార్డులు
‘పరిందా’, ‘క్రాంతివీర్’, ‘అగ్నిసాక్షి’ వంటి చిత్రాలతో ఆయన మూడు జాతీయ చలనచిత్ర అవార్డులను అందుకోవడమే కాకుండా ‘పద్మశ్రీ’ పురస్కారాన్ని కూడా పొందారు. నాటకరంగం, మరాఠీ, హిందీ చిత్రసీమలకు ఆయన అందించిన మహత్తర సేవలకు గుర్తుగా మహారాష్ట్ర ప్రభుత్వం ఆయన అంత్యక్రియలను అధికారిక లాంఛనాలతో నిర్వహించనున్నట్లు ప్రకటించింది.
సామాజిక సేవకుడు
నానా పటేకర్ కేవలం వెండితెర నటుడిగానే కాక, సమాజం పట్ల బాధ్యత కలిగిన వ్యక్తిగా ‘నామ్ ఫౌండేషన్’ (Naam Foundation) ద్వారా కరువు పీడిత ప్రాంతాల రైతులకు ఎనలేని సేవలు అందించారు. ఆయన మృతి పట్ల ప్రధానమంత్రి, పలువురు రాష్ట్రాల ముఖ్యమంత్రులు, మాజీ ముఖ్యమంత్రులు, రాజ‌కీయ నేత‌లు, సినీ ప్రముఖులు, అభిమానులు దిగ్భ్రాంతి వ్యక్తం చేస్తూ తీవ్ర సంతాపాన్ని తెలియజేస్తున్నారు.
