పోలవరం జిల్లా చింతూరు మండలంలోని ప్రకృతి అందాల పొల్లూరు జలపాతం వద్ద ‘ఇరుముడి’ సినిమా చిత్రీకరణ కోసం ఏర్పాటు చేసిన ప్రత్యేక సెట్టింగ్ బ్రిడ్జి భారీ వరద ఉధృతికి కొట్టుకుపోయింది. కొద్దిరోజులుగా కొండవాగుల నుంచి భారీగా వరదనీరు చేరడంతో జలపాతం ఉధృతంగా ప్రవహిస్తోంది. నీటి ప్రవాహం ఒక్కసారిగా పెరగడంతో బ్రిడ్జి వరద తాకిడికి కుప్పకూలింది. ‘ఇరుముడి’ సినిమా విడుదల తర్వాత పొల్లూరు జలపాతానికి పర్యాటకుల రాక భారీగా పెరిగింది. సెలవు రోజుల్లో వేలాది మంది పర్యాటకులు ఇక్కడికి వస్తూ, సినిమాలో కనిపించిన ప్రాంతాలను ప్రత్యక్షంగా చూసేందుకు ఆసక్తి చూపుతున్నారు.
ముఖ్యంగా జలపాతం వద్ద ఏర్పాటు చేసిన బ్రిడ్జి పర్యాటకులకు ప్రత్యేక ఆకర్షణగా నిలిచింది. బ్రిడ్జిపై నుంచి జలపాతాన్ని దగ్గరగా వీక్షిస్తూ ఫొటోలు, వీడియోలు తీసుకునేందుకు సందర్శకులు ఆసక్తి చూపేవారు. అయితే ప్రస్తుతం భారీ వరదల కారణంగా బ్రిడ్జి కొట్టుకుపోవడంతో పొల్లూరు వచ్చే పర్యాటకులు నిరాశ వ్యక్తం చేస్తున్నారు. మాస్ మహారాజా రవితేజ నటించిన ‘ఇరుముడి’ ఆగస్టు 21న విడుదలై ప్రేక్షకుల ముందుకు వచ్చింది. సినిమా విజయంతో పొల్లూరు జలపాతానికి పెరిగిన పర్యాటక ఆదరణ నేపథ్యంలో, ప్రస్తుతం కొట్టుకుపోయిన బ్రిడ్జి ఘటన చర్చనీయాంశంగా మారింది.
