2026 కామన్వెల్త్ గేమ్స్లో (2026 Commonwealth Games) భారత జావెలిన్ త్రో (Javelin Throw) జట్టు మరోసారి తన సత్తా చాటింది. పురుషుల జావెలిన్ త్రో ఫైనల్లో భారత్ ఏకంగా రెండు పతకాలు కైవసం చేసుకుంది. స్టార్ అథ్లెట్ నీరజ్ చోప్రా (Neeraj Chopra) 85.83 మీటర్ల అత్యుత్తమ త్రోతో రజత పతకం సాధించగా, యువ జావెలిన్ త్రోయర్ యశ్వీర్ సింగ్ (Yashvir Singh) చివరి ప్రయత్నంలో 85.41 మీటర్లు విసిరి వ్యక్తిగత అత్యుత్తమ ప్రదర్శనతో కాంస్య పతకాన్ని అందుకున్నాడు. శ్రీలంకకు చెందిన రుమేష్ పతిరాగే (Ramesh Pathirage) 89.75 మీటర్ల అద్భుత త్రోతో స్వర్ణ పతకాన్ని గెలుచుకుని అగ్రస్థానంలో నిలిచాడు. దీంతో జావెలిన్ పోడియంపై భారత్ రెండు స్థానాలను దక్కించుకుని అథ్లెటిక్స్లో మరో ఘన విజయాన్ని నమోదు చేసింది.
మరోవైపు పాకిస్థాన్ ఒలింపిక్ ఛాంపియన్ అర్షద్ నదీమ్ (Arshad Nadeem) ఈ ఫైనల్లో నిరాశపరిచాడు. తొలి ప్రయత్నం ఫౌల్ కావడంతో పాటు, తొలి మూడు ప్రయత్నాల అనంతరం టాప్-8లో చోటు దక్కించుకోలేక పోటీ నుంచి నిష్క్రమించాడు. ఇక నీరజ్ చోప్రా మరోసారి అంతర్జాతీయ వేదికపై పతకం సాధించి తన స్థిరమైన ప్రదర్శనను కొనసాగించగా, యశ్వీర్ సింగ్ (Yashvir Singh) ఒత్తిడిని తట్టుకుని చివరి ప్రయత్నంలోనే కాంస్యాన్ని ఖాయం చేయడం విశేషంగా నిలిచింది. ఈ డబుల్ పోడియం భారత జావెలిన్ త్రో విభాగం బలాన్ని మరోసారి ప్రపంచానికి చాటింది.
