హైదరాబాద్ రూపురేఖలను మార్చే లక్ష్యంతో తెలంగాణ ప్రభుత్వం చేపట్టిన ప్రతిష్టాత్మక మూసీ పునరుజ్జీవన ప్రాజెక్టు మరో కీలక దశలోకి అడుగుపెట్టింది. మూసీ రివర్ఫ్రంట్ ఫేజ్-1 అభివృద్ధి పనులకు రూ.7,345.12 కోట్ల పరిపాలన అనుమతులు జారీ చేస్తూ ప్రభుత్వం గ్రీన్ సిగ్నల్ ఇచ్చింది. ఈ పనులను ఈపీసీ (EPC) విధానంలో చేపట్టనున్నట్లు వెల్లడించింది. మూసీ నది పునరుద్ధరణతో పాటు వరద నియంత్రణ, మురుగు నీటి శుద్ధి, నదీ తీరాల సుందరీకరణ, పర్యాటక అభివృద్ధి, ప్రజలకు మెరుగైన మౌలిక సదుపాయాల కల్పన ఈ ప్రాజెక్టు ప్రధాన లక్ష్యాలుగా ప్రభుత్వం పేర్కొంది.
మరోవైపు, మూసీ రివర్ఫ్రంట్ ఫేజ్-1 పనుల పురోగతిపై రాష్ట్ర ప్రధాన కార్యదర్శి (సీఎస్) ఉన్నతస్థాయి సమీక్ష నిర్వహించారు. ఈ సందర్భంగా గాంధీ సరోవర్ ప్రాజెక్టు భూములను పరిశీలించిన ఆయన, పనులను శాస్త్రీయ ప్రణాళికతో వేగంగా పూర్తి చేయాలని అధికారులను ఆదేశించారు. సాంకేతిక ప్రమాణాలు, పర్యావరణ నిబంధనలను తప్పనిసరిగా పాటిస్తూ నాణ్యతలో ఎలాంటి రాజీ పడొద్దని స్పష్టం చేశారు. ఈ ప్రాజెక్టు పూర్తయితే మూసీ నది పరివాహక ప్రాంతం పూర్తిగా రూపాంతరం చెందడంతో పాటు హైదరాబాద్కు కొత్త గుర్తింపు తీసుకొస్తుందని అధికారులు భావిస్తున్నారు.
