ఇస్రో (ISRO) తన తాజా ప్రయోగం పీఎస్‌ఎల్‌వీ సీ-60 (PSLV C-60) విజయవంతంగా పూర్తి చేసింది. 25 గంటల నిరంతర కౌంట్‌డౌన్ తర్వాత, ఈ ప్రయోగం సోమవారం రాత్రి 9:58 గంటలకు విజయవంతంగా అమలు చేయబడింది. పీఎస్‌ఎల్‌వీ-సీ60 రాకెట్ నిర్దేశిత కక్ష్యలోకి ఉపగ్రహాలను ప్రవేశపెట్టింది. ఈ విజయంతో భారత్‌ స్పేస్ డాకింగ్ టెక్నాలజీని సాధించిన నాలుగో దేశంగా నిలిచింది.
స్పాడెక్స్‌ ఉపగ్రహాలతో కీలక ప్రయోగాలు
ఈ ప్రయోగంలో ఇస్రో “స్పాడెక్స్‌” జంట ఉపగ్రహాలను అంతరిక్షంలోకి పంపింది. వీటితో పాటు నానో శాటిలైట్లను కూడా ప్రయోగించింది. స్పాడెక్స్‌ ఉపగ్రహాలు, ప్రత్యేకమైన డాకింగ్ టెక్నాలజీ ద్వారా అనుసంధానం, విడగొట్టడం వంటి ప్రయోగాలకు ఉపయోగపడతాయి. ఇస్రో ఈ ప్రయోగానికి సంబంధించిన యానిమేషన్‌ వీడియోను సోషల్ మీడియాలో షేర్ చేసింది. భవిష్యత్తులో స్పేస్ స్టేషన్ నిర్మాణానికి, అంతరిక్ష పరిశోధనల్లో భారత్‌కు మరింత దిశానిర్దేశం చేయడంలో ఈ ప్రయోగం ప్రధాన పాత్ర పోషించనుంది.
కొత్త ప్రాజెక్టులకు దారి..
పీఎస్‌ఎల్‌వీ సీ-60 ప్రయోగంలో ఇస్రో 24 ఉపకరణాలను కూడా పంపించింది. వీటిలో 14 ఉపకరణాలు ఇస్రోకు చెందినవి, మిగిలిన 10 వివిధ ప్రైవేట్‌ స్టార్టప్‌ కంపెనీలు, విశ్వవిద్యాలయాల పరిధిలో ఉన్నాయి. ముంబైకి చెందిన అవిటి యూనివర్సిటీ విద్యార్థులు, అంతరిక్షంలో ప్రత్యేక పరిస్థితుల్లో మొక్కల పెరుగుదలను అధ్యయనం చేయడానికి పాలకూర కణాలను పంపించారు. ఇది భవిష్యత్తు పరిశోధనలకు దోహదం చేస్తుంది.
