ఆంధ్రప్రదేశ్ (Andhra Pradesh) ఇంజినీరింగ్, అగ్రికల్చర్ అండ్ ఫార్మసీ కామన్ ఎంట్రన్స్ టెస్ట్ (ఏపీ ఈఏపీ సెట్-2026) (AP EAPCET-2026) ఫలితాలను జేఎన్టీయూ కాకినాడ వైస్ ఛాన్సలర్ ప్రసాద్ (Prasad) విడుదల చేశారు. ఈ ఏడాది ఇంజినీరింగ్, అగ్రికల్చర్ విభాగాల్లో విద్యార్థులు మంచి ప్రతిభ కనబరిచారు.
ఇంజినీరింగ్ (Engineering) విభాగంలో మొత్తం 71.65 శాతం మంది విద్యార్థులు ఉత్తీర్ణులయ్యారు. గుంటూరుకు (Guntur) చెందిన రోషన్ మణి దీప్ రెడ్డి (Roshan Mani Deep Reddy) 95.69 మార్కులతో తొలి ర్యాంక్ సాధించారు. శ్రీకాకుళానికి చెందిన శ్రావ్య 95.59 మార్కులతో రెండో ర్యాంక్ దక్కించుకున్నారు. ఇంజినీరింగ్ విభాగంలో టాప్-10 ర్యాంకర్లలో తొమ్మిది మంది అబ్బాయిలు, ఒక అమ్మాయి చోటు దక్కించుకోవడం విశేషం.
అగ్రికల్చర్ అండ్ ఫార్మసీ (Agriculture and Pharmacy) విభాగంలో 89.59 శాతం మంది అభ్యర్థులు ఉత్తీర్ణులయ్యారు. విజయనగరానికి చెందిన జశ్వంత్ నాయుడు (Jashwanth Naidu) 92.53 మార్కులతో తొలి ర్యాంక్ సాధించగా, హైదరాబాద్కు చెందిన వెంకట్ రెడ్డి 91.84 మార్కులతో రెండో ర్యాంక్ పొందారు.
అగ్రికల్చర్ అండ్ ఫార్మసీ విభాగంలోని టాప్-10 ర్యాంకర్లలో ఐదుగురు అమ్మాయిలు, ఐదుగురు అబ్బాయిలు ఉండటం విశేషంగా నిలిచింది. ఫలితాల విడుదల సందర్భంగా జేఎన్టీయూ(JNTU) అధికారులు విజయవంతమైన విద్యార్థులకు అభినందనలు తెలిపారు. కౌన్సెలింగ్ షెడ్యూల్ను ఉన్నత విద్యామండలి త్వరలో ప్రకటించనున్నట్లు అధికారులు వెల్లడించారు.
