యువ హీరో కిరణ్ అబ్బవరం (Kiran Abbavaram) మరోసారి వార్తల్లో నిలిచారు. ‘KA’ సినిమాతో ఘన విజయాన్ని అందుకున్న ఆయన ఇప్పుడు #KA13 పేరుతో కొత్త ప్రాజెక్ట్ను ప్రకటించారు. అయితే ఈసారి ప్రత్యేకత ఏమిటంటే.. కిరణ్ అబ్బవరం తొలిసారిగా హీరోగా నటించడమే కాకుండా దర్శకుడిగానూ బాధ్యతలు చేపడుతున్నారు. “Ek Dum Bindass Pakaane Waale” అనే క్యాచీ ట్యాగ్లైన్తో విడుదలైన అనౌన్స్మెంట్ సోషల్ మీడియాలో వైరల్గా మారింది. “ఇచట అన్ని రకాల ఎంటర్టైన్మెంట్ వండబడును” అనే డైలాగ్ తరహా క్యాప్షన్ ప్రేక్షకుల్లో ఆసక్తిని పెంచుతోంది. ఈ సినిమా పూర్తి స్థాయి కమర్షియల్ ఎంటర్టైనర్గా ఉండబోతోందని మేకర్స్ సంకేతాలు ఇచ్చారు.
‘KA’ విజయంతో కెరీర్లో మంచి జోష్లో ఉన్న కిరణ్ అబ్బవరం, ఇప్పుడు దర్శకుడిగా (Director) కూడా తన అదృష్టాన్ని పరీక్షించుకునేందుకు సిద్ధమయ్యారు. కామెడీ, యాక్షన్, రొమాన్స్, మాస్ ఎలిమెంట్స్ మేళవింపుతో తెరకెక్కనున్న ఈ చిత్రం షూటింగ్ తాజాగా ప్రారంభమైంది. కిరణ్ తీసుకున్న ఈ కొత్త అడుగు ఇండస్ట్రీలో చర్చనీయాంశంగా మారగా, అభిమానులు కూడా భారీ అంచనాలు పెట్టుకున్నారు. నటీనటులు, సాంకేతిక బృందం, కథాంశం వంటి పూర్తి వివరాలను త్వరలో వెల్లడించనున్నట్లు సమాచారం. హీరోగా తనకంటూ ప్రత్యేక గుర్తింపు తెచ్చుకున్న కిరణ్ అబ్బవరం, దర్శకుడిగానూ విజయాన్ని అందుకుంటారా లేదా అన్న ఆసక్తి ఇప్పుడు సినీ వర్గాల్లో నెలకొంది.
