ఉమ్మడి ఆంధ్రప్రదేశ్ రాజకీయాల్లో తనదైన ముద్ర వేసిన సీనియర్ నాయకుడు, మాజీ ముఖ్యమంత్రి నాదెండ్ల భాస్కర్ రావు (90) బుధవారం కన్నుమూశారు. గత కొంతకాలంగా అనారోగ్యంతో బాధపడుతున్న ఆయన, హైదరాబాద్లోని కాంటినెంటల్ ఆసుపత్రిలో చికిత్స పొందుతూ తుదిశ్వాస విడిచారు. ఆయన మృతితో తెలుగు రాష్ట్రాల్లో విషాద ఛాయలు అలుముకున్నాయి.
1935 జూన్ 23న గుంటూరులో జన్మించిన నాదెండ్ల భాస్కర్ రావు, ఉస్మానియా విశ్వవిద్యాలయం నుండి గ్రాడ్యుయేషన్ పూర్తి చేశారు. వృత్తిరీత్యా న్యాయవాది అయిన ఆయన, రాజకీయాల పట్ల ఆసక్తితో ప్రజాక్షేత్రంలోకి అడుగుపెట్టారు. 1978లో తొలిసారిగా శాసనసభకు ఎన్నికయ్యారు. మర్రి చెన్నారెడ్డి కేబినెట్లో మంత్రిగా బాధ్యతలు నిర్వర్తించారు.
టీడీపీ స్థాపనలో కీలక పాత్ర
1982లో ఎన్టీ రామారావుతో కలిసి తెలుగుదేశం పార్టీ (TDP) స్థాపనలో నాదెండ్ల భాస్కరరావు కీలక పాత్ర పోషించారు. ఎన్టీఆర్ కేబినెట్లో ఆర్థిక మంత్రిగా పనిచేశారు. ఉమ్మడి ఆంధ్రప్రదేశ్కు 11వ ముఖ్యమంత్రిగా ఆయన సేవలందించారు. 1984 ఆగస్ట్ 16 నుండి సెప్టెంబర్ 16 వరకు సరిగ్గా ఒక నెల రోజుల పాటు ఆయన సీఎంగా బాధ్యతలు చేపట్టారు. 1998లో ఖమ్మం నియోజకవర్గం నుండి లోక్సభ సభ్యుడిగా (MP) ఎన్నికయ్యారు. కాంగ్రెస్ పార్టీలో సుదీర్ఘ కాలం పనిచేసిన ఆయన, 2019లో భారతీయ జనతా పార్టీ (BJP)లో చేరారు. ఆయన కుమారుడు నాదెండ్ల మనోహర్ ప్రస్తుతం ఆంధ్రప్రదేశ్ రాజకీయాల్లో చురుగ్గా ఉంటూ మంత్రిగా బాధ్యతలు నిర్వర్తిస్తున్నారు.
నాదెండ్ల భాస్కర్ రావు మృతి పట్ల పలువురు రాజకీయ ప్రముఖులు సంతాపం వ్యక్తం చేశారు. ఉమ్మడి రాష్ట్ర రాజకీయాల్లో ఆయన నిర్వహించిన పాత్రను గుర్తు చేసుకుంటూ, ఆయన కుటుంబ సభ్యులకు ప్రగాఢ సానుభూతి తెలిపారు.
