ప్రముఖ టాలీవుడ్ సింగర్ మంగ్లీపై రూ.10 కోట్ల మోసం కేసు నమోదైందన్న వార్తలు సోషల్ మీడియాలో వైరల్ కావడంతో టాలీవుడ్లో చర్చకు దారి తీసింది. న్యాయవాది సుబ్బారావు చేసిన ఫిర్యాదుతో ఈ విషయం వెలుగులోకి వచ్చిందని ప్రచారం జరుగుతోంది. అయితే ఈ ఆరోపణలను మంగ్లీ తీవ్రంగా ఖండించారు. తనకు ఈ కేసుతో ఎలాంటి సంబంధం లేదని స్పష్టం చేస్తూ, పంజాగుట్ట పోలీసులను ఆశ్రయించి తానే ఫిర్యాదు చేసినట్లు సమాచారం.
తాను కష్టపడి, క్రమంగా ఈ స్థాయికి చేరుకున్నానని, ఎవరినీ ఆర్థికంగా మోసం చేయాల్సిన అవసరం తనకు లేదని మంగ్లీ తెలిపారు. మీడియాతో మాట్లాడిన సమయంలో ఆమె భావోద్వేగానికి లోనై కన్నీళ్లు పెట్టుకున్నారు. సోషల్ మీడియాలో తప్పుడు సమాచారం వేగంగా వ్యాపిస్తోందని, ఆధారాలు లేకుండా చేసే ఆరోపణలు వ్యక్తిగత జీవితం మరియు గౌరవాన్ని దెబ్బతీస్తాయని ఆమె ఆవేదన వ్యక్తం చేశారు. చట్టంపై తనకు పూర్తి నమ్మకం ఉందని, నిజం త్వరలోనే వెలుగులోకి వస్తుందని ఆమె ధీమా వ్యక్తం చేశారు.
