భద్రాద్రి కొత్తగూడెం జిల్లా భద్రాచలం ఏరియా ఆసుపత్రిలో అద్భుత ఘటన చోటుచేసుకుంది. సాధారణంగా పుట్టే శిశువుల బరువు 2.5 నుంచి 3 కేజీల మధ్యలో ఉంటుంది. అయితే ఇక్కడ ఒక మహిళ ఏకంగా 5 కేజీలు 200 గ్రాముల బరువున్న మగ శిశువుకు జన్మనిచ్చి అందరినీ ఆశ్చర్యానికి గురిచేసింది. ఈ ఘటన స్థానికంగా సంచలనంగా మారింది.
సురక్షిత ప్రసవం
ప్రసవం కోసం సంధ్యారాణి అనే గర్భిణి భద్రాచలం ఏరియా ఆసుపత్రిలో చేరారు. పరీక్షల సమయంలో శిశువు బరువు అసాధారణంగా ఎక్కువగా ఉన్నట్లు వైద్యులు గుర్తించారు. ఇలాంటి పరిస్థితుల్లో తల్లి, బిడ్డ ఆరోగ్యం దృష్ట్యా ప్రత్యేక జాగ్రత్తలు అవసరం కావడంతో వైద్య బృందం అప్రమత్తంగా వ్యవహరించింది. శస్త్రచికిత్స ద్వారా ప్రసవాన్ని విజయవంతంగా పూర్తి చేశారు.
5.2 కేజీల బరువుతో పుట్టిన ఈ శిశువు ప్రస్తుతం ఆరోగ్యంగా ఉన్నాడని వైద్యులు తెలిపారు. తల్లి సంధ్యారాణి కూడా క్షేమంగా ఉన్నారు. ప్రభుత్వ ఆసుపత్రిలో ఇలాంటి క్లిష్ట కేసును సమర్థవంతంగా నిర్వహించడంపై ఆసుపత్రి సిబ్బంది, కుటుంబ సభ్యులు సంతోషం వ్యక్తం చేస్తున్నారు.
