విశాఖపట్నం (Visakhapatnam)లోని వందేళ్ల చరిత్ర కలిగిన ఆంధ్రా యూనివర్సిటీ (Andhra University)లో విద్యార్థులు (Students) తీవ్ర ఇబ్బందులు ఎదుర్కొంటున్నారు. యూనివర్సిటీ హాస్టళ్లలోని (University Hostels) మెస్లకు అధికారులు తాళాలు వేసిన ఘటన తీవ్ర కలకలం రేపుతోంది. నిన్నటి నుంచి హాస్టళ్లలో భోజనం అందకపోవడంతో విద్యార్థులు ఆకలితో అలమటిస్తున్నారు.
ఫీజులు (Fees) చెల్లించిన విద్యార్థులకు మాత్రమే మెస్లు తెరుస్తామని అధికారులు హెచ్చరించడంతో పరిస్థితి మరింత ఉద్రిక్తంగా మారింది. ఫీజు రీయింబర్స్మెంట్ (Fee Reimbursement) ఆలస్యం కావడంతో ఇప్పటికే ఆర్థిక ఇబ్బందుల్లో ఉన్నామని విద్యార్థులు ఆవేదన వ్యక్తం చేస్తున్నారు. ఫీజులు చెల్లించే స్థితిలో లేకపోయినా, భోజనం నిలిపివేయడం అమానుష చర్యగా వారు మండిపడుతున్నారు.
ఈ ఘటనపై విద్యార్థి సంఘం ఎస్ఎఫ్ఐ (SFI) తీవ్రంగా స్పందించింది. “ఫీజు కడితేనే మెస్ ఓపెన్ చేస్తామని చెప్పడం క్రూరమైన చర్య” అంటూ అధికారుల తీరును ఎస్ఎఫ్ఐ ఖండించింది. ఫీజు రీయింబర్స్మెంట్ విషయంలో కూటమి ప్రభుత్వం ఘోరంగా విఫలమైందని ఆరోపించింది. ప్రభుత్వం నిర్లక్ష్యం కారణంగా విద్యార్థులు తీవ్ర దుస్థితిలో ఉన్నారని పేర్కొంది.
వందేళ్ల చరిత్ర కలిగిన ఆంధ్రా యూనివర్సిటీలో మౌలిక వసతుల లోపం, పరిపాలనా నిర్లక్ష్యం వంటి అనేక సమస్యలు పేరుకుపోయాయని విద్యార్థులు ఆందోళన వ్యక్తం చేస్తున్నారు. వెంటనే సమస్యలను పరిష్కరించి, హాస్టల్ మెస్లను యథావిధిగా కొనసాగించాలని ఎస్ఎఫ్ఐ డిమాండ్ చేసింది.
భోజనం వంటి మౌలిక అవసరాలను కూడా ఫీజులతో ముడిపెట్టడం విద్యార్థుల జీవితాలతో చెలగాటమాడటమేనని పలువురు విద్యార్థులు ఆగ్రహం వ్యక్తం చేస్తున్నారు. ప్రభుత్వం, యూనివర్సిటీ అధికారులు తక్షణమే స్పందించి సమస్యకు పరిష్కారం చూపాలని వారు కోరుతున్నారు.
