భారత (India) మహిళా క్రికెట్ జట్టు (Women Cricket Team) సాధించిన తొలి వన్డే వరల్డ్ కప్ విజయం (ఫైనల్లో దక్షిణాఫ్రికాపై గెలుపు) క్రికెటర్ల ఆర్థిక భవిష్యత్తును అమాంతం మార్చేసింది. ఈ చారిత్రక విజయంతో, జెమిమా రోడ్రిగ్స్, స్మృతి మంధాన, హర్మన్ప్రీత్ కౌర్ వంటి స్టార్ మహిళా క్రికెటర్ల బ్రాండ్ వాల్యూ ఒక్కసారిగా పెరిగింది. ప్రస్తుతం అందుతున్న నివేదికల ప్రకారం, వారి బ్రాండ్ ఎండార్స్మెంట్ ఫీజులు ఏకంగా 25 శాతం నుంచి 100 శాతం వరకు పెరిగినట్లు తెలుస్తోంది.
వరల్డ్ కప్ తర్వాత కొందరు క్రికెటర్ల సోషల్ మీడియా ఫాలోవర్ల సంఖ్య రెట్టింపు నుంచి మూడు రెట్లు పెరగడంతో, వారి ఫీజులు కూడా అదే స్థాయిలో పెరిగాయి. సెమీ-ఫైనల్లో ఆస్ట్రేలియాపై 127 పరుగులు చేసిన జెమిమా రోడ్రిగ్స్ ప్రస్తుతం బ్రాండ్ల దృష్టిలో హాట్ ఫేవరెట్గా మారింది. ఆమె ఇప్పుడు ప్రచార పద్ధతిని బట్టి రూ. 75 లక్షల నుంచి రూ. 1.5 కోట్ల వరకు ఫీజు వసూలు చేయనుంది.
దేశంలోనే అత్యధిక పారితోషికం పొందుతున్న మహిళా క్రికెటర్గా స్మృతి మంధాన (సుమారు ₹1.5 కోట్ల నుంచి ₹2 కోట్లు) అగ్రస్థానంలో కొనసాగుతోంది. ఆమె ఇప్పటికే నైక్, హ్యుందాయ్, ఎస్బీఐ వంటి 16 బ్రాండ్లకు ఎండార్స్మెంట్ చేస్తోంది. మంధానతో పాటు హర్మన్ ప్రీత్ కౌర్, దీప్తి శర్మ, రిచా ఘోష్ వంటి ఇతర కీలక క్రీడాకారిణుల బ్రాండ్ వాల్యూ కూడా ఈ విజయం తర్వాత గణనీయంగా పెరిగింది. వరల్డ్ కప్ విజయంతో భారత మహిళా క్రికెట్ జట్టు కేవలం క్రీడా రంగంలోనే కాకుండా, వాణిజ్యపరంగా కూడా భారీ మార్పులకు నాంది పలికి, కొత్త చరిత్ర సృష్టిస్తోందని ఈ పరిణామాలు స్పష్టం చేస్తున్నాయి.
