తెలంగాణలో ‘స్థానిక’ ఎన్నికల షెడ్యూల్ విడుదల

తెలంగాణ (Telangana)ప్ర‌జ‌లు ఎప్పుడెప్పుడా అని ఎదురుచూస్తున్న స్థానిక సంస్థ‌ల ఎన్నిక‌ల (Local Institutions Elections) నగారా మోగింది. మూడు ద‌శ‌ల్లో పంచాయతీ, రెండు ద‌శ‌ల్లో ఎంపీటీసీ(MPTC), జెడ్పీటీసీ(ZPTC) ఎన్నిక‌లు జ‌ర‌గ‌నున్నాయి. ఎన్నిక‌ల షెడ్యూల్‌ను తెలంగాణ రాష్ట్ర ఎన్నిక‌ల క‌మిష‌న‌ర్ (Commissioner) రాణి (Rani) కుముదిని వెల్ల‌డించారు. హైదరాబాద్‌లో తెలంగాణ ఎస్ఈసీ రాణి కుముదిని మీడియాతో మాట్లాడారు. ఈ సందర్భంగా స్థానిక సంస్థల ఎన్నికల షెడ్యూల్‌ను అధికారికంగా విడుదల చేశారు. ఎన్నికల నియమావళి తక్షణమే అమల్లోకి వస్తోందని ఆమె వెల్లడించారు. అన్ని రాజకీయ పార్టీలతో చర్చలు జరిపి షెడ్యూల్ ఖరారు చేశామని తెలిపారు.

మొత్తం 31 జిల్లాల్లోని 565 మండలాల్లో ఎంపీటీసీ ఎన్నికలు జరుగనున్నాయి. స్థానిక సంస్థల ఎన్నికలు 5 దశల్లో నిర్వహించబడతాయి. అందులో రెండు దశల్లో ఎంపీటీసీ, జడ్పీటీసీ ఎన్నికలు ఉంటాయి.

అక్టోబర్ 9న ఎంపీటీసీ, జడ్పీటీసీ మొదటి దశ ఎన్నికల నోటిఫికేషన్ వెలువడుతుంది.
నామినేషన్ల దాఖలుకు చివరి తేది అక్టోబర్ 11.

అక్టోబర్ 13న రెండో దశ నోటిఫికేషన్, అక్టోబర్ 15 చివరి తేదీగా నిర్ణయించారు.
అక్టోబర్ 23న ఎంపీటీసీ, జడ్పీటీసీ తొలి విడత పోలింగ్‌, అక్టోబర్ 27న రెండో విడత పోలింగ్‌ జరుగుతాయి.
నవంబర్ 11న కౌంటింగ్ నిర్వహిస్తారు.

మూడు దశల్లో గ్రామ పంచాయతీ ఎన్నికలు
అక్టోబర్ 31న మొదటి దశ,
నవంబర్ 4న రెండో దశ,
నవంబర్ 8న మూడో దశ గ్రామ పంచాయతీ ఎన్నికలు జరుగుతాయి.
గ్రామ పంచాయతీ ఎన్నికల ఫలితాలు పోలింగ్ జరిగిన రోజే లెక్కించబడతాయని ఎన్నికల కమిషనర్‌ రాణి కుముదిని తెలిపారు.