హాకీకి వీడ్కోలు పలికిన స్టార్ ప్లేయర్

భారత వెటరన్ (India’s Veteran) హాకీ ఆటగాడు లలిత్ ఉపాధ్యాయ్ (Lalit Upadhyay) అంతర్జాతీయ కెరీర్‌కు వీడ్కోలు (Farewell) పలికారు. టోక్యో (Tokyo), పారిస్ ఒలింపిక్స్‌ (Paris Olympics)లో కాంస్య పతకాలు (Bronze Medals) సాధించిన భారత జట్టులో ఫార్వర్డ్ ప్లేయర్‌గా లలిత్ కీలక పాత్ర పోషించారు. ఉత్తరప్రదేశ్‌ (Uttar Pradesh)కు చెందిన 31 ఏళ్ల లలిత్, పదేళ్ల సుదీర్ఘ కెరీర్‌కు రిటైర్మెంట్ (Retirement) ప్రకటించడానికి ఇదే సరైన సమయమని భావించారు.

లలిత్ ఉపాధ్యాయ్ అంతర్జాతీయ ప్రస్థానం:
2014 ప్రపంచకప్‌తో అంతర్జాతీయ హాకీలోకి అడుగుపెట్టిన లలిత్, తన కెరీర్ పొడవునా జట్టు విజయాల్లో నిలకడగా రాణించారు. ఆటలో దూకుడు స్వభావం ప్రదర్శిస్తూనే, తన ప్రవర్తనతో ‘జెంటిల్‌మ్యాన్ ప్లేయర్’‌గా గుర్తింపు తెచ్చుకున్నారు.

తాజా సీజన్ ఎఫ్‌ఐహెచ్ ప్రొ లీగ్‌ (FIH Pro League)లో ఆదివారం బెల్జియం (Belgium)తో జరిగిన మ్యాచ్ అనంతరం లలిత్ ఉపాధ్యాయ్ తన రిటైర్మెంట్ నిర్ణయాన్ని సోషల్ మీడియా ద్వారా ప్రకటించారు. “కేవలం అరకొర వసతులుండే ఓ మారుమూల పల్లెతో మొదలైన నా ప్రయాణం సుదీర్ఘకాలం కొనసాగడమే కాదు… నా కలల్ని సాకారం చేసింది. అన్నింటికి మించి దేశం తరఫున ఆడటం గొప్ప గౌరవాన్నిచ్చింది. రెండుసార్లు పోడియంపై నిల్చొని ఒలింపిక్ పతకాలు అందుకోవడం అంతులేని ఆనందాన్నిచ్చింది” అని తన వీడ్కోలు సందేశంలో పేర్కొన్నారు.

భారత హాకీలో లలిత్ పాత్ర:
ఒకప్పుడు ప్రపంచ హాకీలో అగ్రగామిగా ఉన్న భారత జట్టు, ఆధునిక హాకీలో కొంత వెనుకబడింది. అయితే, ఎన్నో ఏళ్ల తర్వాత భారత హాకీ జట్టు 2021 టోక్యో ఒలింపిక్స్‌లో కాంస్య పతకం సాధించి మువ్వన్నెల జెండాను సగర్వంగా ఎగురవేసింది. తదుపరి పారిస్ ఒలింపిక్స్‌లోనూ ఈ పతకాన్ని నిలబెట్టుకుంది. ఈ రెండు చారిత్రాత్మక విజయాల్లోనూ లలిత్ ఉపాధ్యాయ్ కేవలం జట్టు సభ్యుడిగానే కాకుండా, ఫార్వర్డ్‌లో తన నిలకడైన ప్రదర్శనతో జట్టు విజయానికి కీలక సహకారం అందించారు.

విజయాలు, పురస్కారాలు:
పదేళ్ల సుదీర్ఘ కెరీర్‌లో లలిత్ 183 అంతర్జాతీయ మ్యాచ్‌లు ఆడి 67 గోల్స్ సాధించారు. ఆయన కెరీర్‌లో సాధించిన కొన్ని ముఖ్యమైన విజయాలు

ఆసియా ఛాంపియన్స్ ట్రోఫీ విజేత (2016, 2018)
ఆసియా కప్ విజేత (2017)
హాకీ వరల్డ్ లీగ్ ఫైనల్స్‌లో కాంస్యం (2017)
ఛాంపియన్స్ ట్రోఫీలో రజతం (2018)
ఆసియా క్రీడల్లో కాంస్యం (2018), స్వర్ణం (2022)
ఎఫ్‌ఐహెచ్ ప్రొ లీగ్ హాకీ (2021–22)లో మూడో స్థానం సాధించిన భారత జట్టులో సభ్యుడు.
హాకీ మైదానంలో అతని అద్భుతమైన ప్రదర్శన భారత్‌కు అనేక గోల్స్‌తో పాటు పతకాలను తెచ్చిపెట్టింది. అతని కృషికి గుర్తింపుగా భారత ప్రభుత్వం 2021లో లలిత్‌కు ప్రతిష్టాత్మక అర్జున అవార్డుతో సత్కరించింది.