ఎన్నిక‌ల ప్ర‌చారంలో కొలంబియా అధ్యక్ష అభ్యర్థిపై కాల్పులు..

కొలంబియా రాజధాని బొగోటాలో (Bogotá, Capital of Colombia) ఉద్రిక్తతలు చోటుచేసుకున్నాయి. సెనేటర్, అధ్యక్ష అభ్యర్థి మిగ్యుల్ ఉరిబ్ టర్బే (Miguel Uribe Turbay)పై ఓ ప్రచార ర్యాలీ సందర్భంగా గుర్తు తెలియని వ్యక్తి కాల్పులు జరిపాడు. పార్కులోని ఓ కార్యక్రమంలో ప్రసంగిస్తుండగా ఈ దాడి జరిగింది. ఘటన జరిగిన వెంటనే మిగ్యుల్‌కు చికిత్స నిమిత్తం సమీప ఆస్పత్రికి తరలించారు. బొగోటా మేయర్ కార్లోస్ గాలాన్ (Carlos Galán) ఈ ఘటనను అధికారికంగా ధృవీకరించారు. ఘటనకు సంబంధించి ఒక అనుమానితుడిని పోలీసులు అదుపులోకి తీసుకున్నారు.

మిగ్యుల్‌కు చెందిన కన్జర్వేటివ్ డెమోక్రటిక్ పార్టీ (Conservative Democratic Party) ఈ ఘటనను తీవ్రంగా ఖండించింది. ఇది కేవలం ఓ వ్యక్తిపై దాడి మాత్రమే కాదు, దేశ ప్రజాస్వామ్య వ్యవస్థపై జరిగిన దాడిగా పార్టీ పేర్కొంది. ఈ ఘటన కొలంబియా ఎన్నికల రాజకీయాల్లో తీవ్ర కలకలం రేపింది. ఇప్పటికే ఉద్రిక్తతలు కొనసాగుతున్న నేపథ్యంలో ఇటువంటి ఘటనలు ప్రజల్లో భయాందోళనలు కలిగిస్తున్నాయి.