సుదూర ప్రాంతం నుంచి తిరుమల శ్రీవారి (Tirumala Sri Venkateswara Swamy) దర్శనం (Darshan) కోసం వచ్చిన బెంగళూరు (Bengaluru) భక్తులకు ఊహించని షాక్ తగిలింది. త‌మ టికెట్లు (Tickets) నకిలీవని (Fake) తెలియ‌డంతో భక్తులు (Devotees) ఒక్క‌సారిగా ఖంగుతిన్నారు. బెంగళూరుకు చెందిన వర్షా ట్రావెల్స్ (Varsha Travels) ద్వారా 35 మంది భక్తులు తిరుమలకు చేరారు. ఒక్కొక్కరి నుంచి రూ.3,350 వసూలు చేసిన ఈ ట్రావెల్స్ సంస్థ, రవాణా ఖర్చుతో పాటు దర్శనం కల్పిస్తామని హామీ ఇచ్చింది. చెప్పిన‌ట్లుగానే వారి చేతిలో దర్శన టికెట్లు పెట్టింది. అయితే, క్యూలైన్‌లో టికెట్ల తనిఖీ సమయంలో ఈ టికెట్లు నకిలీవని తేలడంతో భక్తులు ఒక్క‌సారిగా షాక్‌కు గురయ్యారు.
ఈ మోసంతో (Fraud) ఆవేదనకు గురైన భక్తులు మీడియా ప్రతినిధులతో మాట్లాడుతూ.. వర్షా ట్రావెల్స్‌పై చర్యలు తీసుకోవాలని డిమాండ్ చేశారు. తిరుమల శ్రీవారి దర్శనం పేరుతో ఇలాంటి మోసాలు చేసే ప్రైవేట్ ట్రావెల్స్ సంస్థలపై కఠిన చర్యలు తీసుకోవాలని కోరారు. టీటీడీ విజిలెన్స్ సిబ్బంది (TTD Vigilance Staff) విచారణ ప్రారంభించారు. భక్తుల నుంచి వర్షా ట్రావెల్స్‌కు సంబంధించిన వివరాలను సేకరించారు. ఈ సంఘటన గురించి టీటీడీ అధికారులు మాట్లాడుతూ.. దర్శన టికెట్లను కేవలం ఆన్‌లైన్ ద్వారా, అధికారిక కౌంటర్లలో లేదా సిఫార్సు లేఖల ద్వారా మాత్రమే తీసుకోవాలని సూచించారు. దళారులు, ప్రైవేట్ ట్రావెల్స్ ఏజెంట్లు లేదా వ్యక్తులను నమ్మి మోసపోవద్దని హెచ్చరించారు.
తిరుమల శ్రీవారి దర్శనం కోసం లక్షలాది భక్తులు దేశ, విదేశాల నుంచి వస్తుంటారు. అయితే, నకిలీ టికెట్ల రాకెట్లు, దళారుల మోసాలు భక్తులను వేధిస్తున్నాయి. బెంగళూరు భక్తులతో జరిగిన ఈ తాజా ఘటన ఇందుకు ఉదాహ‌ర‌ణ. టీటీడీ (TTD) ఈ మోసాలను అరికట్టేందుకు కఠిన చర్యలు తీసుకోవాలని భక్తులు డిమాండ్ చేస్తున్నారు.
