కడప మేయర్ తొలగింపు.. మాధ‌వీరెడ్డి పంతం నెగ్గిందా..?

కడప మున్సిపల్ కార్పొరేషన్ (Kadapa Municipal Corporation) మేయర్ (Mayor), వైసీపీ నేత సురేష్ బాబు (Suresh Babu) ను ఆంధ్రప్రదేశ్ కూటమి ప్రభుత్వం (Andhra Pradesh Coalition Government) పదవి నుంచి తొలగిస్తూ బుధవారం ఉత్తర్వులు జారీ చేసింది. కుటుంబ సభ్యుల పేరిట కాంట్రాక్టు పనులు అప్పగించి మున్సిపల్ చట్టాన్ని (Municipal Act) ఉల్లంఘించారనే ఆరోపణలపై విజిలెన్స్ విచారణ నివేదిక ఆధారంగా ఈ నిర్ణయం తీసుకున్నట్లు పురపాలక శాఖ ముఖ్య కార్యదర్శి తెలిపారు. ఈ చర్య కడప రాజకీయాల్లో తీవ్ర చర్చనీయాంశమైంది. క‌డ‌ప టీడీపీ (TDP) ఎమ్మెల్యే రెడ్డ‌ప్ప‌గారి మాధ‌వీరెడ్డి (Reddappagari Madhavi Reddy) రాజ‌కీయ క‌క్షసాధింపులో భాగంగానే మేయ‌ర్‌ను తొలగించార‌ని వైసీపీ నేతలు మండిప‌డుతున్నారు.

సురేష్ బాబు (Suresh Babu) పై విజిలెన్స్ విచారణ ఫిబ్రవరి 2025లో ప్రారంభమైంది, ఆయన కుటుంబ సభ్యులకు చెందిన వర్ధిని కన్స్‌స్ట్ర‌క్షన్స్ కంపెనీ (Vardhini Constructions Company) కి కడప కార్పొరేషన్ కాంట్రాక్టులు అప్పగించినట్లు ఆరోపణలు ఉన్నాయి. మార్చి 24న ప్రభుత్వం షోకాజ్ నోటీసు జారీ చేసి, 15 రోజుల్లో వివరణ ఇవ్వాలని ఆదేశించింది. ప్ర‌భుత్వ ఆదేశాల మేర‌కు మేయ‌ర్‌ సురేష్ బాబు త‌న స‌మాధానాన్ని ఒక నివేదిక రూపంలో సమర్పించారు. సురేష్‌బాబు స‌మాధానం సంతృప్తిక‌రంగా లేదంటూ ప్ర‌భుత్వం అనర్హత వేటు విధించింది.

కడప కార్పొరేషన్‌లో 50 డివిజన్లలో 49 మంది కార్పొరేటర్లు వైసీపీకి చెందినవారే, గత ఎన్నికల్లో ఈ పార్టీ ఆధిపత్యం సాధించి సురేష్ బాబును మేయర్‌గా ఎన్నుకుంది. అయితే, కూటమి ప్రభుత్వం కడప కార్పొరేషన్‌ను అక్రమంగా కైవసం చేసుకునేందుకు టీడీపీ కుయుక్తులు చేస్తోందని వైసీపీ ఆరోపిస్తోంది. కడప ఎమ్మెల్యే, టీడీపీ నేత మాధవి రెడ్డి కార్పొరేటర్లను కొనుగోలు చేసేందుకు ప్రయత్నించినట్లు, గతంలో ఆమెకు సమావేశాల్లో కుర్చీ అందించకపోవడంపై వ్యక్తిగత కక్ష’ అక్కసుతో సురేష్ బాబును తొలగించారని వైసీపీ నేతలు ఆరోపిస్తున్నారు.

ఈ తొలగింపు నిర్ణయంపై వైసీపీ తీవ్రంగా స్పందిస్తూ, రాజకీయంగా ఎదుర్కోలేక కూటమి ప్రభుత్వం కక్షసాధింపు చర్యలకు పాల్పడుతోందని విమర్శించింది. సోషల్ మీడియాలో ‘#YSRCPFightsBack’ వంటి హ్యాష్‌ట్యాగ్‌లు ట్రెండ్ అవుతూ, సురేష్ బాబు తొలగింపును నిరసిస్తున్నారు. మరోవైపు, కూటమి నేతలు ఈ చర్యను అవినీతికి వ్యతిరేకంగా తీసుకున్న కఠిన నిర్ణయంగా అభివర్ణిస్తున్నారు. కడప కార్పొరేషన్‌లో రాజకీయ ఆధిపత్యం కోసం ఇరు పక్షాల మధ్య పోరు మరింత తీవ్రమయ్యే సూచనలు కనిపిస్తున్నాయి.